DILI, STLTIMORLESTE.com – Prezidente Republika (PR), José Ramos Horta hatete, Timor Leste (TL) ho Portugal iha relasaun metin husi tinan atus ba atus.
Prezidente Republika José Ramos Horta hatoo kestaun nee liu husi nia diskursu bainhira partisipa komemorasaun Loron Portugal, Camões no Komunidade Português sira nian, neebe halao iha Igreja Parokia Santu Antonio, Manatuto, Sabadu (7/06/2025).
Tinan ida nee Komemorasaun nian iha signifikadu espesial, tanba dedika ba Santu Antonio, Santo neebe nia devosaun too iha Manatuto iha sekulu rua liu ba, hodi harii ligasaun espiritual klean ida entre Manatuto ho Lisboa.
“kona-ba relasaun boot no istoriku entre Portugal no Timor Leste, neebe iha abut durante tinan atus ba atus nia laran iha lasu relasaun kultural, linguístika no espíritual,” dehan Prezidente Republika José Ramos Horta.
Prezidente wainhira sei kiik hela iha Manatuto, Ramos Horta fahe memoria pessoal neebe reforsa ligasaun ida nee.
Nia sublina mos kresimentu signifikativu lian português nian iha Timor Leste, atribui meritu ba inisiativa sira hanesan eskola CAFE nian, no destaka mos Portugal nia papel hanesan parseiru estratejiku no aliadu ida neebe metin.
Prezidente destaka mos katak apoiu ida nee determinante tebes ba Timor Leste nian envolvimentu iha nível internasional, liu-liu iha adezaun ba ASEAN no konsolida Timor Leste nia prezensa iha Uniaun Europeia.
Iha final diskursu, Prezidente Republika Ramos Horta fo omenajen ba Embaixadora Portugal sesante, rekonhese ninia kontribuisaun ba haforte relasaun bilateral sira.
Selebrasaun nee nakonu ho espíritu Santu Antonio nian, sai hanesan testemunha forte ida ba relasaun istorika, amizade no kompromissu ho futuru kooperasaun ida neebe prontu ba kresimentu mutuo.
(eme)
