DILI, STLTIMORLESTE.com – Prezidente Republika (PR), Jose Ramos Horta husu Governu liu husi Ministeriu Edukasaun (ME) atu investe makaas ba siensia teknolojia.
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Nicolao Lobato, Bairo Pite, Segunda (27/01/2025).
Nia hatete, presiza investe makaas iha siensia teknolojia, nunee bele prepara nasaun enfrenta dezafiu no oportunidade oin-oin neebe mai.
Prezidente Republika dehan, materia filozofia nee mos importante, maibe Prezidente defende liu mak siensia teknolojia.
Iha fakuldade umanidade filozofia no istoria, biolozia, buat sira nee importante, maibe husik ba Ministeriu Edukasaun, Governu tomak para haree buat sira nee kona-ba kurikulu, maibe ba Prezidente defende liu mak siensia no teknolojia.
Nia katak, Timor Leste tenke investe makaas liu iha kurikulu, iha eskolar dezde kiik kedas kosok oan sira pre-eskolar depois elementar, liseu tenke iha kedas ona siensia teknolojia, konforme klaru kada faze ema idak-idak nia vida, para prepara nasaun ba oin bele enfrenta dezafiu no oportunidade oin-oin sei mai, tanba agora ba oin teknolojia aselera makaas los.
(eme)