DÍLI, STLTIMORLESTE.com – Ministra Edukasaun (ME), Dulce de Jesus Soares husu profesores hotu atu hala’o sira-nia knaar tuir regras no oráriu servisu ne’ebé estabelese ona, inklui marka prezensa tuir oras tama no sai eskola.
Ministra Edukasaun, Dulce de Jesus Soares, hato’o pedidu ne’e ba jornalista sira iha Salaun Ian Martin, Balide, Dili, tersa (27/10/2026).
“Orientasaun mak ne’e, responsabilidade primeiru husi professores mak atu garante katak sira sempre marka prezensa iha eskola tuir oráriu ne’ebé estabelese ona, inklui oras tama no oras sai. La’ós hanorin de’it, maibé sira mós eduka estudante sira ho pasiénsia no responsabilidade,” dehan Dulce.
Tuir ministra, hanesan instituisaun públika seluk ne’ebé iha regras no prosedimentu servisu, professores mós tenke kumpre no hala’o sira-nia responsabilidade tuir normas ne’ebé aplika iha eskola.
Nia esplika katak, iha eskola, diretór, diretór-adjuntu no Gabinete Apoiu Tékniku (GAT) iha responsabilidade atu kontrola no fó apoiu ba professores sira, hodi garante katak prosesu aprendizajen lao ho di’ak.
Dulce kontinua hateten katak, iha sistema edukasaun, inspetór eskolar sira iha knaar atu superviziona no haree profesores sira-nia dezempeñu, inklui bainhira iha professor ne’ebé la kumpre regras no disiplina servisu.
“Kuandu iha profesor ne’ebé kontra regras, inspetór eskolar sira bele foti auto no haruka ba Inspesaun Jerál Ministériu Edukasaun atu halo análize ba kazu ne’e. Depois, ministériu sei analiza asuntu ne’e no, se presiza, bele haruka ba Komisaun Funsaun Públika (KFP) atu kontinua prosesu tuir prosedimentu ne’ebé aplika,” nia esplika.
Ministra Edukasaun afirma katak, Inspesaun Jerál liuhusi inspetór eskolar sira, kontinua hala’o supervizaun ba servisu professores nian, inklui kontrolu kona-ba kumprimentu disiplina no regras servisu iha eskola sira.
(jac)
