DILI, STLTIMORLESTE.com – Ministru Obras Publika (MOP), Samuel Marçal hatete, implementasaun projetu iha Same, Munisipiu Manufahi lentu laiha relasaun ho obra haat (4) lima (5), maibe servisu nee kleur oituan, tanba hadau malu ho mota.
“Hau atu dehan, laiha relasaun ho obra 4 ka 5, maibe servisu husi sorin, taka mota husi sorin, loke sorin fo dala ba mota, nunee ba fali sorin mos hanesan, tanba nee mak han tempu, tanba bee mota nee permanente”, katak MOP, Samuel ba jornalista sira iha Palasiu Governu, Kinta (12/12/2024).
Nia dehan, Deputada sira bele kestiona maibe tanba situasan mak hanesan née. Aleinde nee movilizasaun ba material sira husi Dili mak ba tanba nee la fasil.
“Problema kleur ho la kleur hau ladun kestiona, tanba ita fo oportunidade ba setor privadu nasional sira, tanba nee labele kompara ho Kompanhia Internasional, importante liu mak konstrusaun nee bele eduka sira sai setor privadu diak ho obra kualidade”, hatete governante nee.
Nia afirma, bainhira fo oportunidade ho diak ba sira, neineik sira sei sai Kompanhia neebe diak ho kualidade, nunee bele laran metin ba sira.
Tuir nia, iha dalan nee iha hela alternaivu, maibe ba projetu nee fulan 3 ka 4 hanesan nee remata ona, tanba ida todan nee hotu ona, hela kmaan deit ona.
(gui)
