INFPM Oferese Levoteroxina Tableta 500 Ba HoREX

INFPM Oferese Levoteroxina Tableta 500 Ba HoREX. (Foto: STL/EST 2)

BAUKAU, STLTIMORLESTE.com – Iha loron 23 Janeiru 2025, Institutu Nasional Farmasia Produtu Medikamentu (INFPM) Rejional Baukau oferese ona aimoruk Levoteroxina hamutuk tableta 500 ba Hospital Rejional Eduardo Ximenes (HoREX) Baukau.

Xefe Armajenamentu INFPM Baukau, Adelino Espiritu Santo hatete, pasiente JF nia mate neebe sai polemika, tanba razaun katak HoREX laiha stok aimoruk Levoteroxina, nee konsidera falta komunikasaun entre dirijenti HoREX ho parte mediku no farmasia sira ba INFPM Rejional Baukau, tanba aimoruk refere stok hamutuk tableta 2.500 neebe antes nee garante hela iha armajen INFPM Rejional Baukau.

Maibe tuir informasaun iha parte mediku sira fo fali reseita ba familia pasiente JF hodi sosa aimoruk iha klinika privadu, tanba aimoruk Levoteroxina stok iha HoREX laiha, nunee JF konsege hakotu iis iha loron 21 Janeiru 2025.

“Stok iha nee garante, sira nia pedidu mai ami apoiu ba sira 500 tableta, akontese hanesan nee informasaun ami tenke apoiu fali aimoruk sai iha sistema laran dia 23 Janeiru,” hatete Adelino ba STL, iha knaar fatin Uatulete, Segunda (27/01/2025).

Adelino sujere ba HoREX atu haree sistema estrutural identifika aimoruk sira neebe laiha armajen hodi submete pedidu ba INFPM rejional nunee bele fo apoiu emerjensia, tanba diagnostiku teropia mak save importante ba medikamentus hodi haree kondisaun paseiente sira iha hospital.

Aleinde nee mos Xefe INFPM nee informa, daudaun stok aimoruk iha armajen Institutu Nasional Farmasia Produtu Medikamentu (INFPM) garante hela atu hatan ba pedidu hotu, tanba iha item 282 kompostu aimoruk vital, esensial no nesesariu.

Maibe husi kategoria aimoruk 3 refere hamutuk item 79 kompostu vital 22%, esensial 23% no nesesariu 19% daudaun stok la disponivel iha armajen, maibe nee la fo impaktu, tanba sei submete hikas pedidu ba Nasional hodi kompleta.

Entretantu ligadu asuntu nee, jornalista STL tenta konfirma Diretor Klinika HoREX Baukau liu husi telefone, maibe la fo komentariu, tanba inkomoda ho servisu seluk.

(EST 2)

Share it :

Leave a Reply

Your email address will not be published. Required fields are marked *