DILI, STLTIMORLESTE.com – Inspetor eskolar iha Munisipiu Lautem dala ruma uza sira nian osan rasik hodi ense mina ba motor halo monitoring ba eskola sira.
Kestaun nee hatoo husi Diretor Servisu Edukasaun Munisípiu Lautem, Anibal Fernandes ba STL liu husi telefone, Tersa nee (26/05/2026).
“Inspetores eskolar halao sira nian servisu ho diak nee iha nain 9, inspetor nain 9 ho ita nian superintendente, inspetor sira nee koloka sira tuir sira nian area iha kada postu, kona-ba sira nian fasilidade, motor sira simu ona, maske motor iha ona maibe mina nee mak inspetor sira dala ruma sira ense mina ho sira nian osan rasik,” nia informa.
Anibal dehan, dala ruma osan mai atraza, nee inspetor sira uza rasik sira nian osan hodi bele ense mina, inspetores sira nafatin halo sira nian knaar lao diak hanesan baibain, liu-liu monitoring ba eskola hirak neebe mak lokaliza iha Munisipiu Lautem.
Entretantu Diretor Servisu Edukasaun Munisípiu Ainaro, Patricio da Costa Magno hatete, inspetores sira hetan hotu fasilidade hanesan motor, nee duni sira halao monitoring nee uza transporte neebe mak sira simu ona, maibe inspetor ida ba ESJ nee atu tama ba idade reforma ona.
“Ita nian inspetores sira hetan hotu fasilidade hanesan motor, nee duni sira halao monitoring nee uza transporte neebe mak sira simu ona, maibe inspetor ida ba ESJ nee atu tama ba idade reforma ona,” nia haktuir.
Nia dehan, maske eskola iha area remotas nee ho distansia neebe mak dook, maibe inspetor sira halo sira nian servisu lao ho diak, oinsa mak sira monitoring ba atividades neebe mak lao iha eskola ida-idak.
“Ami nian inspetor sira nee simu hotu transporte motor, nunee bele fasilita sira nian servisu iha terenu lao ho diak,” nia dehan.
(jac)
