DILI, STLTIMORLESTE.com – Atu instala Sentru Juvenil neebe tuir planu sei harii iha Tibar dezenhu iha ona, maibe seidauk iha titulu nain ba rai.
“Dezenhu BoQ Sentru Juvenil iha ona, iha tinan 2014 liu ba, maibe dinamika politika neebe iha halo membru Governu sira husi tempu neeba too mai nee dinamika nee halo balu kontinua balu la iha hanoin atu kontinua ho razaun importante balu,” dehan Diretor Nasional Servisu Prizional no Reinsersaun Sosial, Delfio Soares Alves ba Jornalista sira iha Kaikoli, Segunda (12/05/2025).
Nia hatutan, iha tinan kotuk Diresaun Nasional Servisu Prizaun iha Ministeriu Justisa fo ona kontinuidade ba projeitu ida nee, tanba programa no projeitu ida nee mos hetan konsiderasaun iha IX Governu ida nee, tama iha programa.
Sublina, Diresaun Nasional Servisu Ministeriu Justisa iha ona linha koordenasaun metin ho ADN, no Servisu Jeral Propretaria (SJP) iha linha koordenasaun, falta deit mak atu verifika fila fali halo levantamentu dadus ba rai ida neebe iha Tibar klibur domin nia kotuk. Tanba inisiu iha tinan 2014 dezenhu no BoQ halo bazeia ba rai ida nee, agora tenke update fila fali rai ida nee oinsa mos husu sira nia hanoin kona-ba estatutu rai.
Reforsa, ohin asina ona karta konvokatoriu reuniaun neebe sei konvida MSSI, Diresaun Jeral SEFOPE nian iha Tibar, kadastru, Terras no Diresaun Jeral Politika Justisa, ninia Diresaun Servisu Prizaun atu halo reuniun hodi esplika konaba, progresu oinsa halo koordenasaun ho ADN no Servisu Jeral Propretaria.
Akresenta tan, rai neebe atu harii nee tama oituan ba iha parte MSSI nian, no mos tama ba iha Sentru Formasaun SEFOPE nian iha Tibar. Too agora prizaun seidauk simu atribuisaun titulu nain ba rai. No tuir nia hatene MSSI mos halo hela proposta hodi husu titulu nain ba rai, tanba nee mak konvoka reuniaun atu fo hanoin atu buka solusaun.
Nunee loos hotu ona mak foin hetan titulu sertifikadu nain ba rai, mak foin fo ba iha ADN, kuandu ADN simu ona mak foin bele prosesu ba oin hatoo ba iha Komisaun Nasional Aprovezionamentu (CNA), atu halo fali tenderizasaun ba konstrusaun iha tinan ida nee.
Iha fatin ketak, Akademiku UNTL, Rafael De Jesus dehan, importante duni atu estabelese Sentru nee, tanba oras nee daudaun dadur sira neebe idade joven sei tau hamutuk ho dadur neebe idade boot.
“Importante duni estabelese sentru nee atu tau separa entre dadur neebe idade joven no dadur neebe idade boot,” dehan nia.
Hatutan tan, ohin loron joven barak mak la kontrola aan hodi halo krimi, kria fatin ketak ba sira atu sira tama iha prizaun ho formasaun ba sira hodi muda sira nia hahalok nee banhira sai iha liur.
(ter)
