DILI, STLTIMORLESTE.com — Jurista Timor-oan konsidera, tempu to’o ona atu instala tribunal judisiál iha munisípiu, hodi lori asesu justisa besik liután ba komunidade, liu-liu sira iha área remota.
Jurista José Maria Guterres dehan, tempu to’o ona atu instala tribunal iha munisípiu sira, atu komunidade ne’ebé hela iha área remota bele sente katak justisa hakbesik duni ba sira.
“Tempu to’o ona atu instala tribunal iha munisípiu sira, atu nune’e komunidade sira ne’ebé hela iha área remota bele sente katak justisa hakbesik duni ba sira,” dehan José Maria Guterres ba STL iha Kaikoli, Tersa (25/08/2026).
Nia hatutan katak, komunidade balu hakarak asesu ba justisa, maibé distánsia sai hanesan preokupasaun, tanba parte sira ne’ebé hela iha munisípiu tenke mai Dili no presiza osan ba transporte, hahán no nesesidade seluk.
Nia konsidera planu atu harii tribunal iha munisípiu bele sai pasu pozitivu ba komunidade, tanba bele halo asesu ba justisa sai besik liután. Nia mos dehan, ho rekursu umanu ne’ebé disponivel, tempu to’o ona atu harii tribunal iha munisípiu sira.
Iha sorin seluk, akademiku Universidade Nasionál Timor-Lorosa’e (UNTL), Sebastião dos Santos, apoia proposta atu harii tribunal iha munisípiu, hodi lori justisa hakbesik ba komunidade.
“Harii tribunal iha munisípiu atu lori justisa hakbesik ba komunidade sira, atu sira mos bele sente katak justisa iha duni ba sira no besik ba sira,” dehan Sebastião dos Santos.
Nia hatutan katak, bainhira justisa hakbesik ba komunidade, bele ajuda hamenus kazu pendente, tanba iha kazu balu parte sira la marka prezensa iha prosesu judisiál. Kondisaun ne’e bele halo prosesu adia no kazu pendente kontinua.
Alende ne’e, Prezidente Tribunal Rekursu, Afonso Carmona, dehan tribunal primeira instánsia sei harii uluk iha munisípiu Baucau, Viqueque, Ermera no Suai.
Afonso Carmona dehan, objetivu husi instalasaun tribunal iha munisípiu sira mak hamenus kazu pendente no hakbesik asesu justisa ba komunidade.
(ter)
