DILI, STLTIMORLESTE.com – Institutu Superior Cristal (ISC) seidauk hatama pedidu foun ba Ministeriu Ensinu Superior Siensia no Kultura (MESSK), tanba seidauk iha planu atu loke polo iha munisipiu seluk.
Dehan Reitor Institutu Superior Cristal, Sebastião Perreira ba STL iha nia knaar fatin Balide, Segunda nee (27/01/2025).
“Ami nian polo tolu neebe mak daudaun nee ativu hela mak iha Mumisipiu Baukau, Manufahi no Aileu, nee prienxe kriteriu no akreditadu, agora edifisiu ida iha Maliana nee ensinu sekundariu ninia, laos Ensinu Superior Cristal, tanba nee ami seidauk hatan pedidu foun ruma ba MESSK, tanba ami seidauk iha planu atu loke polo iha munisipiu seluk, nee duni ami nian polo tolu mak sei nafatin,” dehan nia.
Iha fatin seluk, Ministru Ensinu Superior Siensia no Kultura (MESSK), Jose Honorio da Costa Pereira Jeronimo hatete, MESSK husu universidade ka institutu sira loke klase paralelu iha munisipiu tenke prienxe kriteriu neebe ministeriu estabelese ona.
“Hau hanoin too agora ami seidauk simu pedidu foun ruma husi ita nian universidade sira, liga ba atu loke tan klase paralelu iha munisipiu, maibe simu deit husi UNPAZ nian, sira atu taka klase paralelu sira nee hodi ami integra hela, maibe ami la fo resposta, maibe ita nian institutu ka universidade seidauk halo pedidu foun ruma mai ami katak, sira atu loke tan klase paralelu foun iha munisipiu sira,” nia afirma.
Nia hatutan, dala ida tan too ohin loron MESSK seidauk simu pedidu foun, karik loke sira tenke prienxe kriteriu, tanba regras iha hodi aplika ba universidade sira, tanba iha kriteriu lubuk neebe ministeriu fo, nee sira tenke prienxe kriteriu sira nee.
(jac)