DILI, STLTIMORLESTE.com – Jesus konvida ema idak idak atu hadia fuan sai fuan ne’ebé nakonu ho fidelidade no fiar nain, laos deit aparénsia.
Kestaun ne’e hato’o husi Padre Paul Kerans SVD ba STL Tersa (25/08/2026) konvida fiar-na’in sira atu la haree de’it ba aparénsia liur, maibé fó atensaun liután ba pureza fuan, humildade no domin iha moris loroloron.
Padre Paul Kerans iha nia reflesaun bazeia ba Evanjellu Mateus 23:23-26, ne’ebé Jesus fó hanoin kona-ba importánsia atu hadia ema nia laran, la’ós de’it aparénsia iha liur.
“Ita barak fasil atu interese ba buat ne’ebé ita haree furak iha liur. Ita admira ema ne’ebé bonito no furak, ka respeita ema sira ne’ebé iha estatutu aas no uza roupa folin aas. Maibé, aparénsia bele bosok. Buat ne’ebé ita haree iha liur, la sempre hatudu verdade ne’ebé iha laran. Iha Evanjellu ohin, ba Jesus, beleza iha liur la’ós buat ne’ebé importante liu. Nia haree liután ba laran, ba pureza ita-nia fuan no ba ita-nia intensaun ne’ebé loos. Buat ne’ebé matan ema nian la bele haree, maibé ita sente iha kle’an ita-nia fuan, mak buat ne’ebé importante liu ba Jesus. Ne’e tenke sai hanoin ba ita katak, la’ós ema hotu ne’ebé haree di’ak iha liur, iha mos fuan ne’ebé di’ak. Balun husi ita bele haree furak no naroman iha liur, maibé iha laran falta humildade no domin,” dehan Padre.
Iha sorin seluk, iha ema sira ne’ebé karik la furak tuir padraun mundu nian, maibé sira-nia fuan nakonu ho bondade, laran-sadere no santidade.
Padre Paul hateten katak, ema barak fasil atu interese ba buat ne’ebé haree furak iha liur. Ema bele admira sira ne’ebé bonito ka respeita ema ne’ebé iha pozisaun aas no uza roupa folin aas. Maibé, aparénsia la sempre hatudu realidade ne’ebé iha iha ema nia laran.
Tuir padre, Jesus haree liután ba laran ema nian, liuliu pureza fuan no intensaun ne’ebé loos. Buat ne’ebé matan ema nian la bele haree, maibé iha iha kle’an fuan, mak importante ba Jesus.
Nia mós fó hanoin katak ema ida bele haree di’ak iha liur, maibé iha laran bele falta humildade, domin no laran-sadere. Iha sorin seluk, ema ne’ebé la furak tuir padraun mundu nian bele iha fuan ne’ebé nakonu ho bondade, misericórdia no santidade.
Tanba ne’e, padre konvida ema hotu atu la buka de’it beleza iha liur, maibé buka atu hadia fuan no dezenvolve naroman iha laran, ne’ebé Jesus haree no valoriza.
Nia hateten katak, iha ikus, buat ne’ebé importante iha oin Maromak la’ós ita-nia aparénsia, maibé pureza fuan, humildade no domin ne’ebé ita fó ba ema seluk.
Mensajen ida-ne’e sai konvite ba fiar-na’in sira atu haree fila-fali ba sira-nia moris no halo esforsu atu hadia fuan, tanba beleza loos hahú husi laran ne’ebé nakonu ho domin no bondade.
(eme)
