DILI, STLTIMORLESTE.com –Jesus konvida ema hotu tenke fuan nakloke ho valor neebe mak sabedoria moris tuir Maromak nia hakarak.
Kestaun nee hatoo husi Padre Paul Kerans SVD Ba STL Sesta (04/09/2026) hatete, Jesus Kristus konvida nia discípulu sira atu hatene tempu no fatin ba Jejum, festa no mudansa espiritual, liuhusi mensajen kona-ba sakús tua foun no sakús tua tuan, ne’ebé sai tema importante iha Evanjellu tuir São Lukas 5:33-39.
“Mensajen ne’e hatudu katak moris ho Maromak presiza fuan no hanoin ne’ebé nakloke, atu bele simu obra foun husi Espíritu Santu, maibé la presiza rejeita sabedoria no valor hosi buat tuan,” dehan Padre Paul.
Iha Evanjellu, discípulu sira João Batista nian husu Jesus tanbasá discípulu sira Nian la Jejum hanesan sira no Fariseu sira. Jejum iha tempu ne’ebá konsidera hanesan parte importante husi moris relijiozu, hamutuk ho orasaun no esmola.
Jesus hatán katak iha tempu atu Jejum no iha mos tempu atu selebra. Nia uza imajen festa kaben nian atu esplika katak bainhira noivu sei hamutuk ho sira-nia belun sira, tempu ne’e mak ba haksolok no selebra.
Maibé Jesus mos hatudu katak tempu sofrimentu sei mai, no iha momentu ne’ebá discípulu sira sei presiza lori krús no kontinua fiar.
Padre Paul iha nia refleksaun kona-ba Evanjellu ne’e, hateten katak ba discípulu sira, iha tempu atu haksolok iha Maromak nia oin no selebra Nia di’ak. Maibé iha mos tempu atu buka Maromak ho umildade, halo Jejum no arrepende hosi sala.
Refleksaun ne’e mos fó atensaun ba problema hanoin taka, bainhira ema lakohi aprende buat foun ka lakohi simu mudansa iha nia moris.
Jesus uza komparasaun kona-ba “sakús tua foun no sakús tua tuan”. Iha tempu Jesus, tua rai iha sakús. Tua foun sei fermenta no produz gás, tanba ne’e presiza sakús foun ne’ebé fleksível atu bele tahan presaun.
Sakús tuan, ne’ebé ona sai maka’as no la fleksível, bele nakfera bainhira tau tua foun. Komparasaun ida-ne’e hatudu katak fuan no hanoin ne’ebé taka bele difisil atu simu buat foun ne’ebé Maromak hakarak fó.
Maibé Jesus la’ós dehan katak buat tuan tenke rejeita hotu. Sabedoria no valor hosi buat tuan sei nafatin importante. Iha Mateus 13:52, Jesus hatudu katak ema ne’ebé komprende Reinu Lalehan sei bele hasai hosi nia tesouraria buat foun no buat tuan.
“Tanba ne’e, kristaun sira konvida atu aprende hosi pasadu, maibé iha tempu hanesan nakloke ba obra foun husi Espíritu Santu. Ita-nia fuan presiza sai hanesan sakús tua foun: fleksível, nakloke no prontu atu simu Maromak nia graça,” dehan Padre.
Mensajen Evanjellu ne’e ikus mai lori ba pergunta ida ema prontu ka lae atu loke fuan no hanoin, atu simu mudansa no obra foun ne’ebé Espíritu Santu hakarak halo iha ema nia moris.
(eme)
