DILI, STLTIMORLESTE.com – Tribunal Judisial Primeira Instansia Dili kontinua halao programa julgamentu movel ba iha area juridisaun Tribunal Dili nian, hanesan Aileu, Ermera, Likisa no Atauro.
Tuir Juiza Administradora Tribunal Dili, Edite Palmira katak, Tribunal movel kontinua lao, maibe antes atu halao julgamentu refere tenke hatoo uluk pedidu ka programa ba iha Prezidente Tribunal Rekursu, neebe hanesan mos Prezidente Konselhu Superior Majistradu.
“Programa julgamentu movel kontinua lao nafatin, atu halo julgamentu movel iha nia regra fulan ida antes tenke haruka ona programa no pedidu sira nee ba iha Prezidente Tribunal Rekursu hanesan mos Prezidente Konselhu, nia aprova tiha mak Juiz sira bele foin ba,” dehan Juiza Edite ba jornalista sira iha Tribunal Dili, Segunda (09/06/2025).
Nia hatutan, iha julgamentu movel nee iha area krimi nian Juiz sira ba nain tolu Juiz Koletivu, no lori prosesu 30, hodi halao julgamentu durante semana ida iha loron Segunda too Sesta.
Sublina, Tribunal kontinua iha kazu pendente sira, tanba nee mak julgamentu sira kontinua lao, ho tan programa julgamentu movel atu oinsa halo redusaun ba numeru sira nee.
Iha fatin ketak, Akademiku UNTL, Simão dos Santos dehan, julgamentu movel hanesan programa ida neebe diak, atu apoiu hodi redus kazu pendente sira.
“Programa ida neebe diak atu lori justisa hakbesik ba komunidade sira no mos atu redus kazu pendente neebe iha,” dehan nia.
Hatutan tan, ohin loron ema barak kestiona kona-ba justisa iha Timor Leste, ho prezensa autoridade judisial sira ba iha munisipiu, atu sosiedade sira mos bele sente katak justisa hakbesik hela ba sira.
(ter)
