DILI, STLTIMORLESTE.com – Kareta Toyota Hilux ho plat A. 28-262 neebe hetan asidente makaas iha madrugada maizumenus 5:56, iha area Merkadu Lama, Díli, nee Polísia Nasional Timor Leste (PNTL) Liu husi Komando PNTL Munisipiu Dili sei halao prosesu investigasaun.
Komandante Munisípiu Dili, Komisáriu Asisténte Polísia Orlando Gomes hatete, daudaun nee seidauk iha informasaun klaru, maibe Polísia Tranzitu Munisipiu Dili halo ona atuasaun no asegura ona kondutor nomos rekolha ona dadus no evidensia sira hein prosesu investigasaun.
“Hau seidauk hetan informasaun klaru ba asidente nee, maibe hau fiar katak Membru Polisia halao servisu no asegura ona evidensia sira nee no ita sei halo prosesu investigasaun,” hatete Komandante Munisípiu Dili, Komisáriu Asisténte Polísia Orlando Gomes ba jornalista STL liu husi telfone iha Dili, Sabadu (25/07/2026).
Nia dehan, konfirma ba Tranzitu Munisipiu Dili, depois mak fo sai ba publiku konaba kronolojia lo-loos husi kareta neebe soke iha Rotundo Xavier.
“Hau konfirma lai ba Tranzitu Munisipiu Dili mak hau kontatuk fali STL, konaba nia kronolojia lo-loos nee tanba saida mak soke,” nia esplika.
Entretantu Fontes Konfirmadu informa, dadersan madrugada Toyota Hilux nia motorista lakon kontrolu ba kareta no sasurut sae ba Rotunda Avo Xavier, hodi destroi portaun.
“Sim, hau hamriik iha rotunda nee, tanba foin ezersísiu oituan husi Caicoli, maibe kareta refere diresaun husi Sumafro Estádiun Munisipal Díli, bainhira too iha kruzamentu Rotunda Avo Xavier, motorista lakon kontrolu ba kareta, entaun soke kedas portaun nee,” nia informa.
Nia deklara, asidente nee akontese tanba ho velosidade makaas, no Tranzitu Munisipiu Dili too kedas fatin no daudaun nee sei prosesu investigasaun.
“Ita deskonfia kondutor nee lanu, tanba ohin koalia ho ita iis tua, polisia too kedas fatin hodi rekolha evidensia no kontrola situasaun, ho apoiu husi komunidade sira neebe marka prezensa iha fatin,” nia afirma.
(jen)
