BAUKAU, STLTIMORLESTE.com – Komando Polisia Munisipiu Baukau rejistu ona kazu baku tekniku Eletrisidade Timor-Leste, Empreza Publiku (EDTL,E.P) iha Eis Merkadu Vila Nova ba iha Ministeriu Publiku (MP).
Enkuantu vitima husi EDTL.EP neebe hetan kanek ho naran Justino Barbosa Pereira, neebe baku husi Funu Nain FALINTIL Libertasaun Nasional, Clementino Cabral “Mautidi Aliansa”.
Komandante Polisia Munisipiu Baukau, Superintendente Xefe Polisia Antonio Maria de Sa esplika, kazu agresaun fiziku baku tekniku EDTL refere akontese iha loron 09 Dezembru nee, iha neebe tekniku refere apoiu servisu ekipa konjunta husi Autoridade Munisipiu Baukau halo servisu desliga eletrisidade ba fatin negosiu ka baraka balun iha Vila Nova, maibe hetan baku husi suspeitu hodi rezulta kanek iha parte ulun.
“Vitima rasik hanesan funsionariu EDTL nian, kazu nee ita rejistu tiha ona no aprezenta ona ba MP prosesu tuir lei neebe mak iha,” hateten De Sa ba jornalista sira iha nia knaar fatin Vila Nova, Kuarta (11/12/2024).
Tuir Komandante nee katak, kazu refere kategoria krime obstrusaun publiku, tanba halo agresaun fiziku hasoru funsionariu estadu neebe ezerse hela nia funsaun servisu iha terenu, maibe hetan baku husi suspeitu.
Nia rekonhese, bainhira krime obrstrusaun publiku nee akontese, parte seguransa hanesan membru Polisia husi Komando Polisia Baukau iha hela fatin akontesementu, maibe labele halo atuasaun, tanba iha situasaun balun neebe prezisa Polisia kumpri ho pasiva hodi labele hamosu perturbasaun boot.
Tanba nee, Komando Polisia kontinua halo prosesu identifikasaun ba sidadaun terseira parte sira hodi responsabiliza mos ba aktus refere.
(EST 2)
