DILI, STLTIMORLESTE.com – Autoridade lokal no familia matebian neebe hetan soke husi kareta jeep kor mutin iha Aldeia Terra Santa, Suku Madohi, iha loron Sabadu (25/07/2026), maizumenus tuku 5:30 dader, husu ba kareta nain neebe soke atu entrega aan ba polisia, hodi toma responsabilidade ba matebian.
Xefe Aldeia Terra Santa, Sergio Manel da Costa Calao hatete, akontesimentu nee akontese iha loron Sabadu (25/07/2026), maizumenus tuku 5:30 dader, hodi rezulta vitima inan ferik ho idade 60 resin mate iha fatin no kareta nee rasik halai lakon too agora.
“Akontesimentu nee akontese iha Sabadu (25/07/2026), maizumenus tuku 5:30 dader, sai husi uma atu mai buka kalen aat sira hodi atende ba uma laran. Iha akontesimentu ida nee ita la espera, iha tuku 5:30 kareta ida tun husi neeba mai, kareta jeep ida kor mutin. Komunidade maioria la hatene hotu, teki-teki labarik sira atu sai mak hetan inan ferik nee toba hela iha estrada laran, nee mak hodi bolu labarik joven sira mai haree, maibe kareta nee halai lakon liu tiha, too agora mos buka la hetan,” dehan nia ba STL iha Tasi-Tolu, Domingu (26/07/2026).
Nia afirma, nunee iha Sabadu nee kedas Xefe Aldeia husi leten Golgota no Terra Santa hamutuk loke CCTV konsege haree hetan duni kareta nee jeep kor mutin oan ida. Tanba kareta nee oin tun los mai, neebe la hetan plat nee. Maibe kareta nee bele konhese hela no agora la hatene nia paradeiru nee iha neebe.
Kareta nee nia diresaun entre ba Maliana, Likisa no Ermera, fatin 3 nee mak nia halai ba.
“Too agora ami mos la hatene no informasaun nee seidauk tama. Neebe ita hein took aban ka bainrua ida informasaun nee tama ami bele fo sai, tanba xefe aldeia leten mos husu ajuda mai xefe aldeia kraik atu hamutuk hodi buka tuir kareta neebe soke tiha ferik nee hodi responsabliza ba tia ferik nee. Neebe iha Sabadu nee kedas ami mos esforsu aan tama sai Aldeia Terra Santa hodi buka tuir kareta nia paradeiru para iha neebe. Ami haleu hotu too iha Maslidun neeba hodi buka tuir kareta nee maibe la hetan. Nee mak ami fo hatene ba Polisia dehan ami buka sai hotu la hetan,” dehan nia.
Nia hatutan, ho informasaun neebe fo sai liu husi facebook hodi fo hatene ba ema nee atu labele subar aan, diak liu mai entrega aan ona hodi toma responsabilidade ba nia hahalok. Se kuandu liu ona ba oras 72 nia sai ona hanesan buronan, no nuudar autoridade sei nafatin buka ema nee.
Nia afirma, ezijensia husi familia nian neebe sira hatoo mak atu ema nee mai entrega aan, hodi nunee bele rezolve tuir dalan legal nian, hodi responsabilidade ba matebian maibe too agora mos seidauk.
“Hodi kalan mos ami tur iha mate uma hodi koalia hela ba familia katak, se karik entrega aan ita sei bolu malu ba iha polisia, konforme husi familia atu rezolve tuir dalan familia mos bele no tuir dalan legal mos bele hotu. Neebe familia dehan nia prosesu lao ba oin nafatin, maibe tenke toma responsabilidade mos ba matebian,” nia tenik.
Autoridade nee hatete, matebian hela iha Aldeia Golgota, Suku Komoro. Akontesimentu nee mak iha Aldeia Terra Santa bainhira vitima atu tesik mai buka kaleng aat sira iha lixu fatin, nee mak kareta mutin nee soke. Matebian uluk hela iha Aldeia Terra Santa mak muda fali ba iha Golgota nian. Nee mak iha kazu nee Xefe Aldeia parte rua toma responsabilidade hotu ba komunidade parte rua nian. Lais ba akontesimentu nee deit, maibe ba akontesimentu saida deit Xefe Aldeia husi fatin rua nee nian sempre toma responsabilidade hamutuk.
Komunidade Terra Santa, Silverio da Costa dehan, sente triste tanba ema neebe lori kareta soke halai lakon liu hodi la toma responsabilidade ba Avo feto neebe mate kedas iha fatin nee.
Nia husu ba autoridade lokal atu servisu hamutuk ho parte seguransa hodi buka tuir suspeitu neebe soke.
Nunee mos Komunidade Filomeno Araujo hatete, lamenta ho hahalok husi ema neebe soke nee, tanba halai lakon husi nia responsabilidade.
(dom)
