DILI, STLTIMORLESTE.com – Komando Polísia Nasional Timor Leste (PNTL) liu husi Gabinete Planeamentu Estratéjiku (PED) realiza workshop, hodi halo Aprezentasaun Estrutura Programa ba Planu Annual 2026 ba Komando Munisipiu, Unidade, Gabinete no Diresaun sira Komando PNTL.
Nia dehan, atividade nee halao ho objetivu atu aprezenta Planu Annual PNTL ba tinan 2026 nian ba kada Devizaun sira neebe sei implementa atividade refere.
Hatete Komandante Jerál PNTL, Komisariu Jerál Polísia Henrique da Costa ba jornalista sira iha Centro Formação Polícia (CFP) Komoro Dili, Segunda (09/06/2025).
Nia dehan, konvida Komandante Munisipiu, Unidade, Gabinete no Diresaun sira Komando PNTL atu halo diskusaun kona-ba Estrutura Programa Planu Annual 2026 ninian atu nunee husi parte Gabinete Planeamentu Estratejiku (PED) hodi aprezenta ba sira bazeia ba iha Programa neebe mak husi parte Governu ninian fo ona ba Instituisaun PNTL.
“Ita prienxe ita nia atividade sira, tanba nee ita envolve sira hotu atu bele prepara Planu ida ne’ebe mak diak,” nia esplika.
Nia tenik, ba saláriu Vensimemtu US$ 39,924,528.00, no ben servisu US$ 6,354,902.00,nomos transferensia publiku US$ 141,000.00 tanba nee iha OJE tinan 2025 nian hamutuk US$ 46,420,430.00.
“Ita hatene katak orsamentu ba iha PNTL 2025 nee ita hetan purvolta milhaun US$ 46, husi total nee milhaun US$ 39 nee nia kobre ona ita nia Salariu no Vensimentu ninian, maibe ita hatene katak foin daudaun nee ita halo promosaun lubuk ida no sei halo mos rekrutamentu, entaun ba tinan oin nee ita sei tau nafatin atensaun liu-liu ba iha ita nia Salariu no Vensimentu, wainhira kobre sira nee hotu maka ita foin haree fali buat seluk,” nia deklara.
Komisariu Jerál Polísia nee esplika tan, labele haluha mos katak iha tinan ida nee, iha fulan Outubru nee Timor-Leste sei adere ba ASEAN no PNTL hanesan parte Seguransa sai mos hanesan Pilar importante ida neebe maka primeiru bele garante Paz no Estabilidade ba servisu sira nee maibe ita mos sei jere no organiza Seminariu ruma wainhira ita tama ona ba ASEAN.
”Orsamentu PNTL neebe maka preve ba tinan 2026, tanba dala ruma ita nia planu nee ita bele husu too milaun limanulu-resin-haat ka liu, maibe fila fali ba iha ita nia Governu, tanba Givernu mos iha prioridade ba sira seluk laos deit ba PNTL,nunee buat neebe ita prepara la signifika katak, Governu responde kedas no ita mos hatene kada tinan Governu sei mai ho Envelope Fiskal ninian, entaun kada Ministeriu ka Instituisaun neebe maka ita simu, entaun ita nia Planu nee ita tenke Ajusta tuir Envelope neebe maka iha,” nia informa.
Tuir observasaun neebe STL asesu iha terenu, iha workshop nee Xefe Departamentu Finansas no Orsamentu PNTL aprezenta kona-ba Lalaok Ezekusaun Orsamentu PNTL nian iha tinan 2025 neebe tama ona iha Primeiru Trimestre. No pursentu hira maka tenke ezekuta iha fim tinan 2025 nian. Iha mos aprezentasaun husi Tekniku no Ofisial Gabinete PED kona-ba Relatoriu Atinjidu PNTL iha Primeiru Trimestral 2025 no aprezenta mos konaba Formatu Planu Rekursu.
Entretantu hola parte iha atividade nee Komandante Jerál PNTL Komisariu Jerál Polísia Henrique da Costa. Segundu Komandante Jerál Komisariu Polísia Pedro Belo, Inspetur Jeral, Komandante Komandu Supervizaun, Komandante Komandu PNTL Munisipiu 14 inklui RAEOA, Komandante Unidade (UPM, UEP, UPF), Xefe Gabinete, Xefe Departamentu, Diretor Diresaun sira PNTL nian, Vise Prezidente AESPNTL, Amu Kapelaun no Pontu Fokal Administrasaun Komando Munisipiu sira.
(jen)
