DILI, STLTIMORLESTE.com – Provedoria Direitu Umanu no Justisa (PDHJ) komemora loron deklarasaun direitu umanu hodi hametin kompromisu defende direitu umanu, maibe tinan ida nee sidadaun barak mak kontinua sofre ba violasaun.
Tuir Provedor Direitu Umanu no Justisa (PDHJ), Virgilio Da Silva Guterres katak, komemora loron deklarasaun universal direitu umanu nian ba dala 76, balu hakarak halo reflesaun, maibe tempu ona atu hametin kompromisu, atu defende direitu umanu, tuir konstituisaun no lei haruka, tuir vontade neebe espresa liu husi ratifikasaun dokumentu internasional sira neebe Parlamentu Nasional ratifika dezde 2003, tempu ona atu hametin liu tan.
“Tinan ida nee komemora iha situasaun ida neebe realidade sosial hatudu katak, ita nia sosiedade barak liu-liu sidadaun barak kontinua sofre tanba sira nia direitu ekonomia sosial kultural kontinua sai violadu tanba desizaun politika neebe ita nia estadu governu halo,” dehan PDHJ, Virgilio ba jornalista sira iha Timor Plaza, Tersa (10/12/2024).
Tinan ida ka tinan rua liu ba tuir Prevedor nee kazu eviksaun iha Dili laran Baukau no fatin espasu publiku kontinua lao, too agora Komunidade balu seidauk hetan fatin apropriadu ba sira, no labarik barak mak afetadu tanba la hetan asesu ba edukasaun sira tenke fila fali ba iha munisipiu.
Tanba edukasaun nian iha Munisipiu sira afetadu, hafoin Governu desidi la hanaruk profesores kontratadu sira nia kontratu, desizaun halo reforma maibe nia impaktu halo eskola barak nia prosesu aprendizajen perturba.
Nunee iha setor saude prestasaun servisu saude afetadu, aleinde rekursu no mos problema aimoruk neebe falta, ida nee hatudu sidadaun barak nia direitu ekonomia sosial seidauk iha.
Tanba nee Provedor nia knaar atu tau matan ba assuntu protesaun direitu umanu nian, liu husi komemorasaun nee apela ba iha entidade publiku sira no Estadu atu responsabel ba ezekusaun politika publiku nian, tenke tau atensaun oinsa hakonu povu nia direitu ekonomia sosial.
(ter)
