DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba kazu omisidiu neglijente neebe mak komete husi arguidu inisial MG hasoru lezadu inisial MGdR.
Iha indisus katak, arguidu MG hatene kondus ona motor iha estrada publiku iha tempu naruk nia laran, maibe arguidu lakohi trata karta kondusaun.
Iha loron 26/03/2023 maizumenus tuku 00h00 (kalan boot), arguidu ho kondisaun lanu hodi konduz motor marka Honda Beat, matrikula O. 8447 TI, husi diresaun ponte My friend halai kontra sinais tranzitu ba diresaun Bemori nian.
Arguidu konduz motor neebe la iha kondisaun atu halai kalan, tanba motor la iha lampu.
Arguidu obriga aan kondus ho kondisaun refere, la taka kapasete, ho alta velosidade iha nakukun deit.
Ho faktu no sirkunstansia refere, arguidu la konsege kontrola an hodi soke motor marka Nicot/KLX neebe kondus husi vitima MGdR iha estrada publiku Bemori nian.
Konsekuensia direta no nesesariu husi akontesimentu refere, rezulta vitima MGdR mate no mos vitima nia motor hetan estragus total.
Arguidu hatene katak, nia seidauk iha karta kondusaun signifika katak, arguidu la iha autorizasaun husi lei atu konduz kualker transporte iha via publiku. Mezmu nunee arguidu fiar an konduz nafatin motor to mosu asidente ida nee.
Arguidu mos hatene katak, ho kondisaun lanu, nia la iha kondisaun atu kondus motor ho seguru hodi viola groseiramente sirkulasaun rodoviaria nia regra hodi hamosu perigu ba ema nia vida.
Akontesimentu faktu sira deskreve iha leten, rezulta vitima MGdR lakon vida, kauza husi arguidu nia hahalok.
Tanba nee konstitui arguidu MG nudar autor material ho forma konsumada ba konkursu krime hanesan tuir mai, Krime kondusaun perigoza, tuir artigu 209/1 KP, Krime kondusaun ho alkool ka substansia psikotropika nia efeitu, tuir artigu 208/1 ΚΡ no Krime kondusaun sem karta, tuir artigu 207 Kodigu Penal.
Hatan ba akuzasaun nee, arguidu deklara iha momentu neeba arguidu kondisaun lanu, mak koduz motorizada.
Arguidu dehan, iha akontesimentu nee arguidu mos baixa iha Ospital Nasional Guidu Valadares (HNGV), durante fulan rua resin.
Alende nee sasin JdSP deklara, iha momentu neeba sasin hamutuk ho matebian sae motor hamutuk, sasin tuur iha motor kotuk liu husi parte Kintal kiik ba Bekora, motor nee primo nia, matebian mak lori motor, no akontese nee iha parte Bemori nia.
Sasin dehan, sasin sira halai tuir jalur no arguidu mak halai sala jalur, iha kalan akontesimentu nee matebian mate iha hospital.
Rona tiha arguidu no sasin, Tribunal husu atu tama ba iha alegasaun.
Iha alegasaun Ministeriu Publiku deklara, iha produsaun provas MP hare katak, iha faktus foun nunee husu Tribunal atu halo alterasaun husi krime Homesidu Neglijente Groseira, ba fali krime Homesidu Neglijente. No MP husu Tribunal atu kondena arguidu ho pena efetivu.
Defeza deklara, arguidu konfesa faktus, so iha kontrariu akuzasaun nia mak lampu la iha no arguidu mos kondisaun lanu, no arguidu mos kontra sinais Tranzitu. Kona ba indemizasaun sivil depende ba arguidu.
Defeza deklara, husu Tribunal tetu deklarasaun sira hotu, atu aplika pena suspensaun ba iha arguidu.
Hafoin rona tiha parte sira nee, Tribunal adia ba iha loron 2 fulan Julhu tuku 11 dader hodi rona desizaun.
Iha audensia Julgamentu nee prezide husi Juiz singular, José Escurial, Ministeriu Publiku reprezenta husi Prokurador Antonio Tavares, no arguidu hetan asistensia legal husi Defensor Publiku Fernando Lopez.
(ter)
