DILI, STLTIMORLESTE.com – Konsesoins eskolar ba eskola privadu seidauk tama iha konta bankaria eskola nian, no osan refere kada estudantes US$ 1.
Haktuir Diretor Eskola Sekundariu Nobel da Paz Jeremias P. de Jesus ba jornalista STL iha nia knaar fatin, Segunda nee (09/06/2025).
“Kona-ba konsesoins nee too agora seidauk tama, tanba nee ami foin daudaun ami halo ona pedidu ba ministeriu, maibe osan nee seidauk tama, maibe ami nuudar eskola privadu hein deit, bainhira mak husi Ministeriu atu fo apoiu osan ida nee mai ami eskola privadu sira, uluk ami hetan osan ida nee, estudantes ida US$1, nee depende ba total estudantes husi eskola refere,” nia komenta.
Jeremias akresenta, dala ruma osan nee besik ezame mak sai, maibe nee seidauk hatene, tanba bainhira osan nee sai sira sei uza tuir nesesidade eskola nian presiza, tanba eskola Nobel durante tinan rua la hetan konsesoins eskolar, ba tinan nee osan seidauk tama iha konta bankaria eskola nian.
Nunee mos Diretor Eskola Sekundariu Jeral nu. 4 de Setembru Balide, Sergio A.da Cruz hatete, konsesoins eskolar nee tama iha fulan kotuk, nee duni osan nee tama konta bankaria hodi nunee eskola bele uza osan ida nee tuir nesesidade eskola nian presiza, depois mak hatama fali relatoriu.
“Ami nian konsesoins eskolar nee tama ona ami nian konta bankaria eskola nian, ninia montante rihun US$ 28 resin, osan ida nee ami sei uza ba responde administrasaun nian, nunee mos uza ba iha agora daudaun labarik sira nian toilet nee aat ona, nomos sasan ba iha ezame trimestre nian, maibe relatoriu mak seidauk, tanba agora servisu sei lao nafatin, too ba iha ezame trimester segundu ninia nee hotu mak foin bele hatama relatoriu,” nia esplika.
Entretantu Diretor Eskola Sekundariu Tekniku Vokasional 28 de Novembru Bekora, Tomas Pinto hatete, konsesoins eskolar seidauk tama iha konta bankaria Eskola Tekniku Vokasional 28 de Novembru Bekora.
“Ami nia konsesoins eskolar seidauk tama konta bankaria eskola nian, tamba ami Tekvo sei tama iha fulan Junhu se lae Novembru, nee duni too agora ami nian konsesoins eskolar seidauk tama, iha ezame primeiru periodu neebe mak ita halao tiha ona nee ami deve rental US$ 50,” dehan nia.
(jac)
