BAUKAU, STLTIMORLESTE.com – Konstrusaun Eskola Ensinu Sekundaria Lequi–Loiuatu iha Aldeia Makadai, Suku Triloka, Postu Administrativu Baukau Vila atinji ona 100%.
Xefe Suku Triloka, Reinaldo Nicolao da Silva esplika, konstrusaun Eskola Sekundariu Lequi–Loiuatu, Governu liu husi Ministeriu Edukasaun apoiu tuir ezijensia komunidade sira nian, tanba estudante barak neebe husi Suku Triloka no Suku vizinhu seluk tan neebe ba eskola iha Baukau Vila distansia dook.
Nunee iha tinan hirak ba kotuk dirijenti eskola sira foti inisiativa loke eskola paralelo husi Eskola Sekundariu Jeral 01 Tirilolo iha Aldeia Aubaka, maibe difikulta prosesu aprendizajen, tanba utiliza deit edifisiu eskola terseiru siklu Aubaka.
Tanba nee iha tinan 2023 Ministeriu Edukasaun aloka orsamentu liu husi Programa Konstrusaun no Reabilitasaun Infraestrutura Edukativa (PKRIE) hodi konstrui sala 6 inklui fatin saneamentu ba Eskola Sekundariu Lequi-Loiuatu iha Aldeia Makadai neebe progresu konstrusaun fiziku finaliza ona.
“Kondisaun fiziku liga ba konstrusaun eskola nee agora daudaun lao tiha ona ba 100%, tanba buat hotu kompleta ona,” hateten Reinaldo ba STL iha Triloka, Tersa (10/06/2025).
Nia sublina, konstrusaun edifisiu eskola finaliza ona, tanba kuaze asesoria sira kompleta ona, maibe seidauk bele entrega, tanba limpeza iha areadores edifisiu eskola nian seidauk remata, maibe bainhira remata limpeza sei entrega ba parte eskola hodi utiliza.
Autoridade Suku nee espresa sentimentu agradese ba Governu, tanba bele konsidera povu nia anspirasaun no preokupasaun hodi konstrui edifisiu eskola ba povu nia oan sira iha baze.
“Se kuandu eskola nee utiliza ona laos benefisiu ba Suku ida nee ou Suku vizinhu mak utiliza, karik Munisipiu seluk ba parte edukasaun nee asesu ba publiku nian, neebe Munisipiu seluk mos bele asesu,” Reinaldo argumentu.
Reprezentante estudante sekundaria Lequi-Loiuatu, Numina Sara da Silva sente kontente, tanba Suku Triloka bele hetan konstrusaun foun ba edifisiu eskola sekundaria nian.
“Husi Makadai ba Aubaka lao dook, tanba ami lao deit oras ida ho balun foin too eskola, sente triste tanba lao loron manas, maibe agora diak oan, tanba eskola foun iha ona, maske seidauk entrega, maibe ami kontenti,” Numina espresa.
Entretantu konstrusaun eskola refere jere husi kontraktor grupu komunitariu ho valor orsamentu US$ 203,854.82, neebe edifisiu eskola refere kompleta mos rampa hodi fo asesu ba maluk Ema ho Difisiensia sira neebe utiliza kadeira roda.
(tom)
