DILI, STLTIMORLESTE.com – Jurista Timoroan Sergio Dias Quintas konsidera katak, halo kontratasaun ba profisionais laos Timoroan desnesesariu.
“Hau hanoin nuudar Jurista neebe pratika direitu iha Tribunal tinan barak nia laran, se halo kontratasaun temporariu ba profisionais não Timorenses nee desnesesariu, tuir hau nia pontu de vista nuudar Jurista nee desnesesariu,” dehan Sergio ba STL, iha Tribunal Dili, Sesta (28/02/2025).
Nia hatutan, iha ona numeru Masjistradu Judisial Ministeriu Publiku no Defensor Publiku numeru ida neebe sufisiente, razaun mak seidauk halo jestaun didiak no halo konsolidasaun diak atu jere rekursu umanus neebe iha. No tinan ida nee numeru Majistradu Judisial Juiz Prokurador no Defensor Publiku sei aumenta, tanba formandu balu tuir hela formasaun iha Portugal.
“Se halo kontratu ba profisionais não Timorenses liu-liu ba malae sira Ministeriu Publiku ka Defensor Publiku neebe atu mai presta sira nia servisu iha nee. Ezemplu atu prosesu direitamente, ita sei gasta osan barak, Estadu sei hasai osan barak selu sira no kria kondisaun ba sira,” hatete Sergio.
Nia hatutan, sira kaer prosesu neebe mahar boot tenke buka tradutor hodi tradus, tanba nee dala ruma sira kaer prosesu ida deit sira nia kontratu hotu sira bele fila ona, no hanoin ida nee la efetivu ida. Tanba nee aseita sira mai presta servisu nuudar asesoria mentoria nuudar inspetor sem duvidas, tanba ita presiza servisu asesoria mentoria no inspesaun nee nesesariu.
Iha fatin hanesan, Prezidente Tribunal Rekursu (PTR), Deolindo Dos Santos dehan, se sai lei ona kumpri saida mak iha lei.
“Se sai lei ona kumpri saida mak iha lei, iha Konstitusaun hateten klaru kompetensia idak-idak nian, prezidente nia kompetensia, Parlamentu Nasional nia kompetensia, Governu nia kompetensia no Tribunal nia kompetensia oinsa, tanba nee labele kahur sasan, idak-idak halao nia knaar, buat neebe laos hau nia kompetensia hau ba tama hotu iha neeba Estadu la lao,” dehan PTR, Deolindo.
(ter)
