DILI, STLTIMORLESTE.com – Ministeriu Edukasaun (ME) liu husi Diresaun Nasional Ensinu Sekundariu Jeral kada loron legaliza diploma, maibe ninia kuantidade depende ba nesesidade.
Informa Diretor Nasional Ensinu Sekundariu iha Ministeriu Edukasaun, Benjamin Gomes da Cruz Fernandes ba STL iha nia knaar fatin ME, Kuarta nee (03/06/2026).
“Hau hanoin iha fulan Maiu tinan ida nee ami legaliza ona diploma hamutuk 400 resin, husi fulan Janeiru mai too agora mak ami hetan 31 diploma falsu nee, ami legaliza diploma nee ninia volume nee la permanente ou la hanesan, tanba depende ba iha nesesidade ou ema neebe mak atu konkore vaga no balun neebe mak atu kontinua sira nian estudu,” nia komenta.
Nia dehan, kada loron atende ema nee depende, tanba ema balun ba iha bolsu estudu ruma, nee legaliza ninia kuantidade nee boot tebes, nee loron ida sira bele atende ema 200 resin, maibe kuandu laiha vagatura ruma, laiha bolsu estudu ruma, nee ninia kuantidade nee ladun barak, nee duni depende ba iha nesesidade deit.
“Durasaun legaliza diploma nian ami ladun halo kleur, hatama ohin aban foti, maibe bainhira diploma nee orijinal, ami la hasoru difikuldade iha legaliza diploma, tanba ami uza sistema, ami ajuda bainhira lori diploma nee orijinal, hakarak legaliza urjente, nee ami bele ajuda legaliza kedas, maibe diploma falsu nee diresaun nunka atu ajuda buat neebe mak falsu,” nia akresenta.
Nia afirma, hahu husi fulan Fevereru diresaun ida nee legaliza ona diploma hamutuk 1143, Marsu 2073, Abril 1143, Maiu 456, nee duni husi diresaun ida nee nafatin atende ema neebe mai legaliza sira nian diploma iha ME.
(jac)
