DILI, STLTIMORLESTE.com – Tempu kuarezma bolu ema fila fali ba Maromak, lao iha dalan loos liu husi dalan tolu mak esmola, jejun no abstenensia.
Dom Virgilio hatete, kuarezma loron 40 neebe santa igreja konvida ema hotu atu prepara nia aan hodi selebra festa boot Santa Paskua, tanba nee ba too iha neeba hahu ho sinzas, ahi kdesan neebe kose iha ita nia rentos fo hanoin fali mai ita kona-ba ita nia moris loron-loron.
“Tempu kuarezma loron 40 bolu ema fila ba Nai Maromak, fila fali atu lao iha dalan neebe los, dala ruma iha moris tinan tomak nia laran preokupa ho buat barak, dala barak halai tuir buat barak la fo importansia ba esensial katak saida mak folin liu iha moris nee, tanba preokupa liu servisu, saude nee hotu importante, maibe aas liu ida nee oinsa ema moris duni tuir Maromak nia hakarak ka lae? tanba nee iha tempu kuarezma 40 dias nee bolu ema hotu liu husi ahi kdesan nee, fo hanoin fila fali ba buat barak neebe halo, nee dala barak hanesan ahi kdesan folin laek naben tiha deit, nunee iha kuarezma bolu ema atu lao iha dalan los, tuir dalan Maromak nian, tanba konvida ita fo hanoin hodi halo jejun, esmola no abastenensia,” hàtete Arsebispu Metropolitana Dili, Dom Virgilio Kardeal do Carmo da Silva, SDB ba jornalista sira iha Igreja Katedral, Dili, Kuarta nee (05/03/2025).
Bibi Atan Igreja Katolika nee hatutan, aktu tolu nee konvida ema iha tempu kuarezma nee atu halo orasaun hodi hanoin fila fali ita nee mai husi Maromak, hatene agradese moris mai husi Maromak, buat hotu neebe halo nee liga nafatin ba Maromak, esmola katak halo karidade, halo diak ba ema seluk atu ita ba too Maromak, labele taka matan ba maun alin sira, tanba moris iha sosiedade ida, moris ho maun alin sira presiza mos tau matan, atu loke matan haree maun alin sira, haree Maromak mak jejun no abastenensia, wainhira ita iha duni korajen atu hatene hateke ba ita nia laran, hateke ba ita nia aan no moris,” hatete Dom Virgilio.
“Bainhira o moris sai obastaklu labele haree maun alin sira, tanba nee iha tempu kuarezma nee aktu tolu nee santa kreda bolu ema hametin relasaun ho Maromak ho maluk sira ho aan rasik, atu nunee bolu fila fali, tanba moris nee prezente ida Maromak fo atu hatene agradese oinsa moris iha rai nee, wanhira hatene tau aktu tolu nee tau aan nuudar prezente Maromak nian, ba maluk sira lori ema ba Maromak nee mak tempu kuarezma 40 dias fo hanoin ba ema hotu katak susar los, tan nee hahu kuarezma tau ahi kdesan ba ita dehan hahu hanoin idak-idak nia frakeza sala sira, tanba kuarezma nia rohan mak paskua, maske ema iha frakeza nee hotu, maibe Maromak fo nafatin esperansa, wainhira ema idak-idak hakaas aan sei hetan esperansa ida nee, katak loron ida nia mos bele hetan ksolok nafatin ho Maromak iha ninia reinu,” hatete Dom Virgilio Kardeal.
(joa)
