DILI, STLTIMORLESTE.com – Prezidente Republika (PR), Jose Jose Ramos Horta hatete, labele argumenta ba tama politiku, Deputada no Governu tanba hakarak hetan pensaun vitalisia nee la justu.
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Nicolao Lobato, Bairo Pite, Segunda (27/01/2025).
“Nee labele argumentu fali, ita la ba buka tama partidu politiku ita la buka ba parlamentu ka ba governu atu buka hetan pensaun vitalisia, iha rai seluk atu hetan pensaun vitalisia pelumenus mandatu tenke 3 ka 4 liu tan, se hetan tiha mandatu 3 ka 4 bele simu ona pensaun vitalisia, sira sei haree mos ba idade, sei la fo pensaun vitalisia nee bainhira o idade sei joven idade atu servisu, kuandu too ona idade reforma entaun mak fo pensaun vitalisia, se hetan pensaun vitalisia mak idade 30 anos ka 40 anos, entaun o la ba servisu ona, portantu ita nia halo sala boot hahu iha Primeiru Governu Konstitusional momentu neeba Doutor Mari Alkatiri mak hahu pensaun vitalisia no hau mak asina nuudar Prezidente Republika iha 2007,” katak PR Horta.
Prezidente Republika dehan, momentu neeba Doutor Mari Alkatiri kontaktu ba Prezidente Republika husu favor atu asina se la asina entaun la konsege iha pensaun vitalisia, no momentu neeba Prezidente nia preokupasaun boot liu mak oinsa buka estabilidade iha rai laran, tanba foin sai husi krize boot 2006 no 2007 krize difisil los.
“Entau hau hanoin saida mak prioridade ba hau atu veta tiha, no momentu neeba hau koalia ho doutor Mari katak pensaun vitalisia nee uniku no espesial so deit ba sira neebe partisipa iha asembleia konstituante, entau tanba nee mak hau asina, pensaun vitalisia hanesan asembleia konstituante neebe hakerek konstituisaun no aprova konstitusaun faktus istoria ida. Entau prontu ita fo pensaun vitalisia ba sira, laos para depois tinan-tinan ema servisu tinan 4 hetan pensaun nee la justu,” katak PR Horta.
Prezidente Republika dehan, se deputadu no deputada tama tinan 4 mak hetan ona pensaun vitalisia, ida nee la justu, tanba profesor servisu tinan 40 tinan 50, no foin lalais PR kondekora profesor balun maibe seidauk hetan pensaun, depois deputadu sira tinan 4 deit simu ona pensaun, nee labele.
“Tenke reve, hau la hatete atu koa ou oho tiha lae, maibe tenke haree didiak reformula nee para sai justu no sustentável ba ita,” katak PR Horta.
Foin lalais Prezidente Parlamentu Nasional, Maria Fernanda Lay hatete, deputadu neebe mak sei halao hela servisu seidauk simu pensaun vitalisia, karik laiha nesesidade ba deputadu sira mak laiha pensaun vitalisia futuru ema lakohi sai deputadu no deputada.
(eme)