DILI, STLTIMORLESTE.com – Komandante Tranzitu Seguransa Rodaviaria Nasionál, Superintendente Asistente, Luis da Costa hatete, se hakarak labele hamosu engarrafamentu no asidente iha sidade Dili, hotu-hotu neebe lori transporte publiku no privadu tenke iha konsiensia.
Nia dehan, Polisia Nasional Timor Leste (PNTL) Departamentu Nasional Tranzitu no Seguransa Rodoviária (DNTSR) sempre halo sosializasaun ba komunidade sira atu lori karreta ou motor tenke iha konsiensia, nunee bele hamenus asidente no engarrafamentu iha Sidade Dili. Transporte iha estrada publiku nee laos ema funsionariu deit, maibe ema hotu-hotu.
“Dala barak hau koalia, ita nia konsiensia umanu mak seidauk iha,” hatete Superintendente Asistente, Luis da Costa ba jornalista sira iha nia knaar fatin Komando Jeral PNTL, Dili, Tersa (14/1/2025).
Luis hatutan, husi programa Ministeriu Interior (MI) no servisu hamutuk ho INAP fo informasaun ba funsionariu hotu-hotu kona-ba lalaok utilizasaun transporte.
Iha fatin ketak, Kondutor Mikrolete 010, Adelino Pinto deklara, daudaun nee transporte privadu mak barak liu fali transporte publiku, tanba realidade sempre akontese engarrafamentu iha Sidade Dili.
“Tuir hau nia observasaun, transporte privadu mak agora barak liu iha sidade Dili, ita haree motor mos barak demais, karreta privadu, tanba nee ita husu para atu se deit mak lori karreta ou motor tenke utilizasaun nee ho diak, atu nune’e labele iha asidente no engarrafamentu,” nia afirma.
(jen)