DÍLI, STLTIMORLESTE.com —Eis Deputadu hosi Partidu Sosial Demokrata (PSD) no Eis Koordenador CNRT Konsulta Popular 1999 nian, Leandro Isaac, fó manifestasaun no apoia foun ba polítika ne’ebé implementa hosi Prezidente El Salvador, Nayib Bukele, kona-ba obrigatoriedade lé Bíblia ba estudantes no dádur sira.
Iha nia manifestasaun, Leandro Isaac foti matadalan hosi Eskritura Sagrada, liuliu sita Jesus Cristo nia liafuan ne’ebé hakerek iha livru Evanjellu: “Ó sei hatene lia-lós, no lia-lós sei halo ó sai livre.”dehan Leandro Isaac ba STL, iha Dili, Tersa nee (25/08/2026).
Isaac apoia pasu ne’ebé El Salvador foti hodi lori liafuan Maromak nian ba foin-sa’e no dádur sira iha prizaun, nu’udar meius hodi troka mentalidade no haburas moral.
Nia subliña katak transformasaun husi laran ne’ebé mai husi konesimentu ba lia-lós espirituál mós bele lori liberdade ba ema hotu—la’ós de’it liberdade fiziku ba dádur sira, maibé liberdade husi sala no hahalok aat.
Nia hare katak lé Bíblia iha eskola sira sei ajuda hametin valór etika, disiplina, no domin ba belun sira nuudar matadalan ba nasaun nia futuru.
Eis Deputadu nee subliña katak, rona no moris tuir Maromak nia liafuan mak odamatan boot ba mudansa sosiál, no reabilitasaun ne’ebé loos iha sosiedade nia laran.
Iha parte ketak, Katekista Mariano Soares, nuudar matadalan Igreja nian fó nia opiniaun katak inisiativa ne’e, nu’udar pasu ida ne’ebé ho folin boot ba transformasaun klamar no hahalok ema nian. Tuir Mariano Soares, lé Bíblia la’ós de’it atu hatene istória Relijiaun nian, maibé nu’udar meius ne’ebé mak bele kuda domin, haraik-an, no arrependimentu ne’ebé loos iha foin-sa’e sira-nia laran no mós ba dádur sira iha prizaun hodi hakat ba moris foun.
Entretantu, Akademista husi Universidade da Paz (UNPAZ), Ronaldo da Cruz, fó nia matadalan katak inisiativa sosiál sira ne’ebé mak foti husi valór relijiozu sei foti papel signifikativu bainhira lao hamutuk ho edukasaun ba kaadidade intelektual no disiplina akademiku.
Tuir Ronaldo da Cruz, lé Bíblia iha eskola no prizaun sira bele sai meius krusiál ida hodi haburas etika, maibé tenki kumpri ho polítika públika ne’ebé estruturadu hodi garante katak transformasaun hahalok ne’e la’ós de’it ho asisténsia morál, maibé mós fo espasu ba dezenvolvimentu krítiku no intelektuál husi estudantes no prizioneru sira.
(car)
