DÍLI, STLTIMORLESTE.com — Lei N.º 9/2026 kona-ba Arte Marsiais presiza implementasaun justu no transparente, atu garante oportunidade hanesan ba organizasaun hotu no evita diskriminasaun.
Observadór Polítika, Antonio Magno konsidera lei foun ne’e nu’udar oportunidade, atu buka solusaun ba impase arte marsiais ne’ebé kleur ona.
Nia husu, Governu no KRAM atu aplika regra foun ho imparsiál.
“Revogasaun Lei N.º 5/2017 ne’e pasu korajozu. Lei foun tenke orienta arte marsiais ba desportu no edukasaun karakter, la’ós ba violénsia,” dehan Antonio Magno ba STL, iha Delta, Díli, Tersa (27/10/2026).
Nia mós afirma katak, implementasaun transparente bele fó konfiansa ba organizasaun sira, atu partisipa iha dezenvolvimentu arte marsiais no kontribui ba paz no estabilidade.
“Se implementasaun ne’e justu, organizasaun sira sei sente katak Estadu fó oportunidade hanesan, no sira sei sai parseiru ba paz no estabilidade,” nia hatutan.
Iha parte ketak Akademista Universidade Nasionál Timor Lorosa’e (UNTL), Silveiro Soares, konsidera períodu tranzisaun to’o Janeiru 2027 nu’udar tempu importante, atu prepara organizasaun sira no esplika regra foun ba komunidade.
“Lei foun ne’e tenke sai instrumentu edukasaun, la’ós kontrolu de’it. KRAM presiza halo sosializasaun iha komunidade, liuliu ba foin-sa’e, atu arte marsiais hametin fali disiplina no solidariedade,” dehan Silveiro Soares.
Nunee mos iha konferénsia imprensa iha sede KRAM, segunda-feira (26/10)/2026) Prezidente KRAM, Octávio da Conceição, hatete katak Lei N.º 9/2026 promulga iha 22 Jullu 2026 no hahú vigora ona semana kotuk.
Lei ne’e revoga Lei N.º 5/2017 no estabelese mekanizmu foun ba regulasaun, fiskalizasaun no dezenvolvimentu arte marsiais. Prátika ofisiál sei reativa iha 22 Janeiru 2027.
Lei foun ne’e estabelese komisaun rua. Komisaun Fiskalizasaun no Monitorizasaun Prátika Aprendizajen Arte Marsiais, iha tutela Ministériu Interiór (MI), sei monitoriza infrasaun, indisiplinu no krime ne’ebé liga ho prátika arte marsiais.
Enkuantu Komisaun Reguladora Desportu Arte Marsiais, iha tutela Ministériu Juventude, Desportu, Arte no Kultura (MJDAC), sei promove edukasaun sívika, diálogu ba rezolusaun konflitu no kompetisaun desportiva.
KRAM sei servisu hamutuk ho Federasaun Silat Timor-Leste (FSTIL) atu dezenvolve modalidade Silat no prepara organizasaun sira atu kumpre regra foun.
(car)
