DILI, STLTIMORLESTE.com – Enkaregadu Negosius Interinu husi Embaixada Indonezia iha Timor Leste, Nugroho Aribhimo hatete, saudozu Francisco Guterres Lu Olo eroi ida neebe konsistente iha luta.
Enkaregadu Negosius Interinu husi Embaixada Indonezia iha Timor Leste, Nugroho Aribhimo hatoo lia hirak nee ba jornalista sira, bainhira remata halo despedida ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kuarta lokraik (24/06/2026).
Nia hatete, saudozu Francisco Guterres Lu Olo nuudar eis-Prezidente hanesan mos kombatente ida ba Timor Leste. Nia konsistentemente luta too ninia vida nia rohan, nia kontribuisaun makaas ba Timor Leste.
Nia mos marka ho momentu solidariedade nian ida, iha neebe reprezentante Indonezia nasaun nia naran, hatoo kondolensia klean liu ba falesimentu saudozu eis Prezidente Republika, Francisco Guterres Lu Olo neebe fila fikas ona ba nain nia kadunan Santo rohan laek.
Diplomata nee louva tebes memoria eis Xefe Estadu nian, hodi presta omenajen no destaka nia nuudar kombatente istoriku ida neebe mantein konsistente no dedika aan ba nasaun too rohan.
“Hanesan ita hatene, Francisco Guterres Lu Olo nuudar eis Prezidente ida neebe hanesan mos kombatente ida ba Timor Leste. Nia konsistentemente luta too rohan”, dehan Nugroho.
Iha biban nee nia mos hatoo sentidu kondolensia ba Saudozu nomos familia enlutada no povu Timor Leste neebe lakon nia ema diak ida neebe ho konsisten hodi lori rai nee ba hetan ukun rasik aan.
Nia hatete, mai hasoru malu ho Prezidente Republika hanesan despedida, aleinde nee mai hatoo mos nia sentidu gratidaun tristeza ba falesimentu saudozu Francisco Guterres Lu Olo.
(eme)
