BAUCAU, STLTIMORLESTE.com – Diretora kompanhia Nautetu Fatima Unipessoal Lda, Maria Madalena dos Santos Fatima hateten, kompanhia la abandona projetu konstrusaun bee moos iha Suku Letemumo, Postu Administrativu Quelicai, Munisipiu Baucau, tanba servisu kontinua lao.
“Kona-ba bee moos neebe kanaliza husi Uaibitai ba Postu Quelicai, hau rona Xefe Suku nia intervensaun nee hau rejeita total, tanba kompanhia hau nia servisu too ona 85%, tanba BTL halo ona inspesaun selu ona 75%,” hateten Madalena ba STL liu husi telefone, Kinta (18/06/2026).
Nia esplika, projetu konstrusaun no kanalizasaun bee moos husi Uaibitai ba Quelicai Vila responsabiliza husi kompanhia rua, mak hanesan kompanhia Nautetu kanaliza responsabiliza husi bee matan too rate lakudala nian atual atinji ona 85%, tanba kanalizasaun kanu sira husi bee matan too area lakudala finaliza ona, hein halo koneksaun kanu sira neebe responsabiliza husi kompanhia JATONO hodi fornese bee moos ba komunidade sira, maibe too ohin loron seidauk, tanba kompanhia JATONO seidauk halo koneksaun.
Nia sublina, servisu husi kompanhia Nautetu Fatima atual iha terrenu kontinua lao, maibe difikulta husi estrada Quelicai Vila ba Uaibitai atual kondisaun aat, tanba nee seidauk transporta material lokal sira hanesan rai henek no britas ba fatin konstrusaun atu finaliza projetu refere.
“Kondisaun estrada mak la diak atu tula tan rai henek 60 ret ense iha tanki filitrasaun ho britas 45 ret atu ense iha tanki filitrasaun Uaibitai nee mak seidauk, tanba estrada nee mak ami hein bai-loron ami ense iha neeba,” Madalena komenta.
Nain ba kompanhia nee husu Autoridade Suku no Postu atu halo monitorizasaun ba projetu refere, nunee bele hatene nia progresu servisu iha terrenu.
(tom)
