BAUKAU, STLTIMORLESTE.com – Funu Nain FALINTIL Libertasaun Nasional, Clementino Cabral “Mautidin Aliansa” husu Primeiru Ministru, Kay Rala Xanana Gusmão atu esplika asaun Autoridade Munisipiu Baukau foti desizaun muda negosiante sira husi merkadu Vila Nova no Vila Antiga ba merkadu foun Tuanau.
“Hau husu favor ida, Primeiru Ministru tenke too iha povu nia leet haree saida mak agora daudaun akontese iha Baukau laran, ita nia Primeiru Ministru mak hateten hau mai terus ho povu, hau husu Primeiru Ministru esplika didiak ba povu hau sai husi fatin ida nee,” hatete Mautidin ba jornalista sira iha eis merkadu Vila Nova, Kuarta (11/12/2024).
Mautidin hatete, presiza Primeiru Ministru too iha Baukau hodi haree kondisaun real neebe daudaun povu liu-liu negosiante sira enfrenta iha merkadu foun Tuanau, tanba kondisaun merkadu neebe daudaun Autoridade Munisipiu Baukau aloka negosiante ba, kondisaun seidauk sufisiente, maibe Primeiru Ministru haluhan ona kompromisu neebe hatoo ba povu katak, hadia povu nia moris husi infraestrutura bazika.
Mautidin argumenta, kona-ba prosesu dezenvolvimentu prontu koopera, maibe durante Autoridade Munisipiu inisia planu muda negosiante sira falta informasaun no kooperasaun ho entidades sira liu-liu la simu negosiante sira nia preokupasaun ba preparasaun ba fatin negosiu nian iha merkadu foun Tuanau.
Tanba fatin negosiu neebe negosiante sira voluntariu idak-idak harii seidauk prontu, maibe Autoridade Munisipal duni negosiante sira hanesan animal fuik iha sidade laran hodi ba sulan iha merkadu foun neebe konsidera iha infernu laran, tanba kondisaun hanesan estrada, bee moos, eletrisidade no seluk tan, iha merkadu foun refere seidauk merese ba fatin negosiu.
No bainhira Primeiru Ministru la marka prezensa iha Baukau hodi haree no responde preokupasaun negosiante nian, sai husi fatin negosiu hodi ekipa konjunta husi Autoridade Munisipiu Baukau sobu, maibe bainhira Primeiru Ministru rasik la marka prezensa, prontu mate iha fatin refere, tanba hakarak defende negosiante 879 neebe daudaun sofre ba asaun ekipa konjunta husi Autoridade Munisipiu Baukau.
(EST 2)
