DILI, STLTIMORLESTE.com – Ministeriu Edukasaun (ME) liu husi Unidade Kurrikulu Nasional, halo ona distribuisaun livru balun ba eskola sira, enkuantu livru balun seluk sei kontinua iha faze impresaun.
Koordenador Gabinete Unidade Kurrikulu Nasional iha ME, João Mau Pelu, hato’o informasaun ne’e ba STL iha nia knaar fatin, Sesta (04/09/2026).
João Mau Pelu hateten katak, ME liu husi Unidade Kurrikulu Nasional, kontinua prosesu impresaun livru iha sentru impresaun atu responde ba nesesidade eskola sira.
“Hau hanoin konaba ita-nia livru balun, ita hahu distribui ona ba ita-nia eskola sira. Nune’e mos ita-nia kaderneta eskolar balun distribui ona, maibé balun ita nafatin halo impresaun. Agora eskola sira ne’ebé sei menus livru no kaderneta, presiza halo pedidu mai para ita bele distribui tuir nesesidade eskola nian,” katak João.
Nia esplika katak, bainhira livru seidauk sufisiente ba estudante ida-idak, eskola bele organiza estudantes iha grupu ida ka rua atu uza livru hamutuk, liuliu durante prosesu aprendizajen iha sala aula.
“Ba oitavu ano, iha fim do ano ita sei imprimi 27 mil kada disiplina. Iha des disiplina ne’e, la inklui relijiaun. Kada livru ita sei imprimi 27 mil. Ita-nia planu ne’e sei minimu, ne’ebé kobre ona minimu estudante ida livru ida. Maibé ita sei esforsu. Karik la to’o hanesan ohin, eskola sira halo jestaun grupu, mai impresta livru sira ne’e atu uza,” katak nia.
Iha parte seluk, Diretor Eskola Sekundária Jerál 10 de Dezembro Comoro, Manuel Verdial hateten katak, fasilidade meza no kadeira inklui kaderneta eskolar ba estudantes sira sufisiente hela no la iha problema.
Maibé, nia hateten katak difikuldade ne’ebé eskola enfrenta agora mak kona-ba livru ba disiplina balun, ne’ebé to’o agora seidauk sufisiente.
(jac)
