DILI, STLTIMORLESTE.com – Ministeriu Edukasaun (ME) liu husi Diresaun Nasional Edukasaun Inkluzivu Asaun Sosial Eskolar (DNEIASE) halao ona sensibilizasaun ba implementasaun programa merenda eskolar ba dirijenti eskola no Autoridade Munisipiu.
Asuntu nee hatoo husi Diretor Nasional Edukasaun Inkluzivu Asaun Sosial Eskolar, Fernando Soares ba jornalista STL, Kuarta nee (11/06/2025).
“Atividade sensibilizasaun dekretu Governu Nu 3/2025 halo ona ba RAEOA no Munisipiu Vikeke, ita halo sensibilizasaun nee ba ita nian dirijenti eskola no Autoridade Munisipiu iha iha Munisipiu rua nee hotu, ita halo sensibilizasaun kona-ba implementasaun programa merenda eskolar neebe mak lao iha ita nian eskola sira,” nia haktuir.
Nia hatutan, ho dekretu Governu Nu 3/2025, ekipa husi DNEIASE foin hahu uluk sensibilizasaun primeiru iha RAEOA remata ona no agora daudaun kontinua fali ba iha Munisipiu Vikeke, Munisipiu Dili seidauk halao sensibilizasaun.
Nunee mos Diretor EBC Manleuana, Carlos Correia hatete, uluk sira tuir ona formasaun kona-ba lalaok implementasaun programa merenda eskolar iha eskola sira, formasaun nee husi ministeriu mak fo.
“Uluk husi parte ministeriu fo ona formasaun mai ami dirijenti sira, formasaun refere kona-ba implementasaun programa merenda eskolar ninia, oinsa mak atu implementasaun programa nee ho diak liu tan iha eskola,” nia esplika.
Iha parte seluk, Diretor Servisu Edukasaun Munisipiu Ainaro, Patricio da Costa Magno dehan, kona-ba sensibilizasaun husi ME ba tinan nee seidauk halao, liu-liu sensibilizasaun kona-ba implementasaun merenda eskolar ninia, tanba ida nee kompetensia husi Ministeriu nian, liu husi diresaun neebe haree asuntu refere.
“Hau hanoin kona-ba sensibilizasaun husi ME ba tinan nee seidauk halao, liu-liu sensibilizasaun kona-ba implementasaun merenda eskolar ninia, tanba ida nee kompetensia husi Ministeriu nian liu husi diresaun neebe haree asuntu refere,” dehan nia.
(jac)
