DÍLI, STLTIMORLESTE.com – Ministériu Edukasaun (ME), iha kolaborasaun ho Komisaun Funsaun Públika (KFP) no Ministériu Finansas, hala’o ona ezersísiu atu prosesu pagamentu ba direitu pendente profésor sira nian, inklui subsídiu área remota, mudansa eskalaun no subsídiu kargu xefia.
Diretora-Jerál Administrasaun no Finansas ME, Cecília Asis Belo, hato’o informasaun ne’e ba jornalista sira iha salaun Ian Martin, Balide, iha Tersa (27/10/2026).
Cecília esplika katak, ezersísiu ne’e inklui profésor sira ne’ebé servisu iha área remota, estranamentu remota no área muito remota, ne’ebé seidauk simu subsídiu tuir sira-nia direitu.
“Pagamentu retroativu ba subsídiu área remota, estranamentu remota no área muito remota, inklui profésor sira ne’ebé koloka iha área hirak-ne’e, sei hala’o bazeia ba orientasaun husi Primeiru-Ministru. Profésor sira ne’ebé seidauk simu subsídiu sei hetan sira-nia direitu,” dehan Cecília.
Nia hatutan katak, ba profésor sira ne’ebé hetan bolsa kandidatu ME no koloka iha área hirak-ne’e, pagamentu retroativu sei kobre períodu husi fulan Maiu 2024 to’o Dezembru 2026, ho númeru profésor na’in 826, tuir informasaun ne’ebé nia hato’o.
Cecília mós esplika katak, montante subsídiu depende ba kategoria área servisu, ho taxa 40%, 25% no 15% husi saláriu báziku, tuir kategoria ne’ebé aplika ba profésor ida-idak.
Iha fatin hanesan, Ministra Edukasaun, Dulce de Jesus Soares, aproveita oportunidade ne’e atu fó klarifikasaun ba profésor sira ne’ebé seidauk simu subsídiu no benefísiu seluk, inklui mudansa eskalaun, progresáun eskalaun no subsídiu kargu xefia.
Dulce de Jesus Soares dehan katak, subsídiu ba área remota, estranamentu remota no área muito remota mak direitu profésor sira nian ne’ebé kleur ona seidauk rezolve, tanba ne’e, ME sei servisu hamutuk ho instituisaun relevante atu buka solusaun ba pagamentu pendente hirak-ne’e.
(jac)
