DILI, STLTIMORLESTE.com – Ministériu Edukasaun (ME) hamutuk ho Ministériu Saúde (MS) kontinua fó formasaun ba direjente eskola kona-ba implementasaun programa merenda eskolar.
Xefi Departamentu Programa Merenda Eskolar iha ME, Belchior Maria Almeida Barros, hato’o informasaun ne’e ba STL iha nia fatin servisu, Kuarta-feira (16/09/2026).
Nia hatete katak formasaun ba direjente eskola sei hala’o iha munisípiu sira, ho formasaun ne’ebé komesa iha loron 22 to’o 24 fulan nee, no sei kontinua tan iha loron 28.
“Formasaun komesa ona iha loron 22 iha Munisípiu Liquiçá, Bobonaro, Oecusse no Ermera. Formadór sira husi ME no MS, inklui Kordenadór Munisípiu DPHO no Diretór Sentru sira, sei fó formasaun ba direjente eskola sira,” nia dehan.
Belchior informa katak partisipante sira iha formasaun inklui kordenadór pre-eskolár, kordenadór Ensinu Baziku Filial (EBF), diretór Ensinu Baziku Sentral (EBC) no GAT.
Nia hatutan katak, formasaun ba munisípiu sira iha parte leste, inklui Dili, hala’o ona durante fulan sira liubá. Agora, formasaun kontinua iha munisípiu seluk, no sei remata iha Munisípiu Manufahi, Ainaro no Covalima.
“Munisípiu hat iha parte leste, inklui Dili, halo ona formasaun. Agora, iha loron 22 sei hala’o tan formasaun iha munisípiu hat ne’ebé hau mensiona, no iha loron 28 sei kontinua iha Manufahi, Ainaro no Covalima. Tolu munisípiu nee mak formasaun ikus,” nia dehan.
Tuir Belchior, formasaun nee hala’o durante loron tolu no ko’alia kona-ba menu no oinsá atu implementa programa merenda eskolar iha eskola sira.
Nune’e mós, Kordenadora EBF Vila-Verde, Josefina Maia, hatete katak sira partisipa ona iha formasaun kona-ba implementasaun programa merenda eskolar, ne’ebé hala’o husi ME no MS.
“Kona-ba merenda eskolar, buat hotu lao diak, tanba lao tuir orientasaun husi Munisípiu. Foin dadaun ami mós tuir formasaun kona-ba oinsá atu implementa merenda iha eskola no oinsá atu hasoru dezafiu sira kona-ba merenda,” nia esplika.
Nia hatutan katak formasaun ko’alia liu-liu kona-ba jestaun orsamentu no implementasaun menu tuir manual.
“Ami ba tuir formasaun nee, ko’alia liu kona-ba oinsá atu jere orsamentu tuir nia dalan no lao tuir menu ne’ebé iha manual. Ami fila fali mai halo tuir orientasaun ne’ebé ami hetan liu husi formasaun,” nia esplika.
Entretantu, GAT EBC Manleuana, Narciso Pinto Soares Vieira da Costa, hatete katak sira tuir ona formasaun husi ME kona-ba implementasaun menu no jestaun orsamentu ba programa merenda eskolar.
“Ami tuir ona formasaun kona-ba implementasaun programa merenda eskolar, oinsá atu jere orsamentu no menu ba programa nee tuir manual ne’ebé iha ona,” nia deklara.
(jac)
