DILI, STLTIMORLESTE.com – Ministeriu Edukasaun (ME) kondena profesores ou dirijenti eskola neebe halo asaun asediu seksual hasoru estudantes, no ME husu deskulpa ba publiku.
Ministra Edukasaun, Dulce de Jesus Soares hatoo kestaun nee ba jornalista sira liu husi konferensia imprensa iha sala VIP ME, Sesta nee (28/02/2025).
“Uluk nanain hanesan Ministra Edukasaun, primeiru kondena atitude ida neebe mak halo husi pesoal husi ME iha neebe deit, tantu nasional, munidipal, eskola no iha fatin hotu-hotu, tanba ME nian knaar boot tebes-tebes, atu garante edukasaun ida nee laos ema matenek deit, maibe ema neebe iha etika moral no responsabilidade iha komunidade. Ho situasaun ida nee dala ida tan ME husu ba publiku katak, ME foti responsabilidade atu garante katak, pasu edukativu hotu sai pasu espasu neebe mak seguru, atu nunee bele halao prosesu aprendizajen ho diak. Nee iha etika profisional nee koalia kona-ba ema nian etika moral no ema nian atitude, prontu hanesan ita ema tuir lo-loos ita hatene katak, buat sira nee labele akontese,” tenik nia.
ME Dulce husu ba komunidade tomak atu servisu hamutuk ho ME, estudantes no profesor bele garante ambiente ida neebe mak diak ba estudantes sira, husu deskulpa se karik situasaun ida nee akontese husi pesoal edukasaun nian, maibe asaun neebe mak ME foti hanesan koalia tiha ona, no iha dekretu governu iha 2017 koalia kedas asuntu ida nee katak, bainhira iha asaun ema neebe mak halo no sai ema neebe proteje estudante ida, maibe nia mak halo fila-fali asaun sira neebe mak karik atu estraga estudante nee nia fizika ou phisikolojikamente nia merese para atu bele halo suspensaun imediatamente.
“ME la tolera ba asaun neebe akontese, ami simu ona informasaun husi familia kona-ba asaun asediu seksual neebe komete husi dosente ka manorin sira iha eskola no ME iha pozisaun ida katak, kondena profesores neebe mak halo situasaun ida nee, husu nafatin fiar husi inan aman sira, nomos akompanha alin feto nain rua, sira nain rua bele ho sira nia neon ho sira nia hanoin rasik, nomos apoiu familia nian, sira mai ona hatoo informasaun ida nee mai ami, no ami nain tolu rasik hasoru malu ho menina oan sira nee, ami agradese tebes ba sira, fo korajen ba sira, atu sira bele kontinua sira nian estudu, hau rasik sei tun ba eskola sira nee atu koalia ho profesor no dirijenti iha nee ba,” nia esplika.
(jac)
