DILI, STLTIMORLESTE.com – Ministeriu Edukasaun (ME) kontaktu ona Ministeriu Administrasaun Estatal (MAE) hodi haree situasaun okupantes neebe hela iha areador eskola sira.
“Kontaktu ona MAE hodi haree situasaun ida nee, klaru espasu eskola nee iha momentu ida nee ami hakarak apela ba komunidade sira katak, ita nian oan sira mak eskola iha nee ba, karik espasu eskola nee mak ita ba okupa hotu, tanba nee Ministeriu liu husi Edukasaun Munidipal, depois notifikasaun mos tama ba sira neebe mak hela iha espasu eskola ninia,” dehan Sekretariu Estadu Ensinu Sekundariu Jeral no Ensinu Sekundariu Tekniku Vokasional, Domingos Lopes Lemos ba jornalista sira iha salaun Ian Martin Balide, Kuarta nee (04/06/2025).
Nunee mos Diretor Eskola Sekundariu nu. 4 Setembru Balide, Sergio A. da Cruz hatete, tuir lo-loos kada eskola nee ninia moru nee tenke haleu, atu nunee bele projete diak liu tan eskola, komunidade uma kain neen mak daudaun nee hela iha areador Eskola Sekundariu nu 4 Setembru Balide, no sira hela dezde iha tinan 1999 too mai agora.
“Ba komunidade neebe mak hela iha ita nian resintu eskola nee mak kuaze problema nee situasaun hanesan nee hela, tuir hau nian hatene nee sira parte husi SEATOU nian mai koalia, neebe foin lalais fo sai iha notisia nee dehan semana nee nia laran ho komunidade sira neebe mak hela iha areador eskola nee parte ida ita bele dehan duni katak, ita haree ambiente eskola ladun diak, tanba sira sempre halo movimentu iha areador eskola, ita haree ba ladun diak, depois kada eskola nee tenke ninia moru nee haleu,” dehan nia.
Entretantu Diretor Eskola Baziku Sentral (EBC) 10 de Dezembru Komoro, Calistro A. Guterres dehan, okupantes foin daudaun iha 21 Marsu Autoridade Munisipiu Dili ho ekipa boot ida, inklui nibel edukasaun nasional, munisipal sira mai hotu ona enkontru ho Xefe Suku no Xefe Aldeia sira ho komunidade sira aseita ho saida.
“Okupantes foin daudaun iha 21 Marsu Autoridade Munisipiu Dili ho ekipa boot ida inklui nibel edukasaun nasional, munisipal sira mai hotu ona, enkontru ho Xefe Suku no Xefe Aldeia sira ho komunidade sira aseita ho saida mak autoridade fo ba sira katak, primeiru sei halo identifikasaun ba komunidade sira neebe hela iha eskola laran, identifikasaun halo hotu tiha ona, dadus hatama hotu tiha ona, hein para komunidade sira hetan notifikasaun, bainhira notifikasaun nee mak foin halo asaun katak, data determina bainhira mak atu husik hela eskola ida nee, komunidade sira nee lori fali ba iha neebe,” dehan nia.
Nia dehan, komunidade sira nee prontu koopera, tanba iha nee maioria profesor deit, foin daudaun Diretor Jeral husi ME, Deolindo mos mai iha nee ho Prezidente Autoridade Munisipiu esplika ba profesor sira prontu koopera, maibe sai ho dignu no hein bainhira fo notifikasaun, sira prontu bele husik eskola.
“Iha nee hamutuk familia lo-loos nee 13, profesores hamutuk uma kain 6, maioria nee estudantes no komunidade husi familia profesores ninia, neebe sira mak okupa areador eskola,” nia informa.
(jac)
