DILI, STLTIMORLESTE.com – Ministeriu Edukasaun (ME) ho KFP no INSS sei kontinua identifika profesores moras prolongada iha Munisipiu Manufahi iha loron 18 fulan ida nee.
“Ami nian tekniku hirak neebe mak tun ba terenu iha Munisipiu Manatuto nee remata no sira fila ona mai, agora planu ba oin nee mak sei ba iha Munisipiu Manufahi, nee tuir planu sei ba iha loron 18 fulan ida nee nian laran. Ami nian ekipa nee kompostu husi ME, INSS no KFP, munisipiu tolu mak ami identifika ona ita nian profesores neebe moras prolongada, nee mak hanesan Munisipiu Likisa profesores moras prolongada 22, Baukau 30 resin no Manatuto 18,” afirma Diretor Nasional husi ME, Joao Amaral ba STL, Tersa nee (03/06/2025).
João dehan, munisipiu tolu mak remata ona no tuir planu sei ba fali Munisipiu Manufahi iha loron 18 fulan nee, halo identifikasaun nee depende ba iha kuantidade profesores moras prolongada, bainhira iha Manufahi remata sei kontinua ba iha Munisipiu Kovalima, nee hotu sira sei haree fali dadus profesores moras prolongada.
“Ami sei identifika fali dadus iha munisipiu neebe mak ita nian profesores moras prolongada ita atu halo identifikasaun, liu-liu ita nian munisipiu neebe mak prontu ona, nee mak foin ita halo identifikasaun,” katak nia.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prolongada nee dadus haruka ba ona iha rekursu umanu nasional.
“Kona-ba ita nian profesores neebe moras prolongada nee ita haruka ona dadus ba ita nia rekursu umanu nasional ME nian, atu nunee bele haree asuntu ida nee,” nia afirma.
(jac)
