DÍLI, STLTIMORLESTE.com – Ministériu Edukasaun (ME) rekonese katak, eskola sekundária sira iha Timor-Leste sei menus profesór ba disiplina Língua Portugés, Tetum no Desportu.
Diretór Nasionál Ensinu Sekundáriu Jerál, Benjamin Gomes da Cruz Fernandes, hateten katak problema ne’e akontese iha eskola sekundária sira iha territóriu nasionál.
Nia esplika katak, ME loke ona vaga rekrutamentu profesór, maibé kandidatu barak la hatudu interese atu prienxe vaga sira ne’ebé disponivel.
“ME loke hela vaga, maibé ema la iha interese atu prienxe vaga sira ne’e. Tanba ne’e, ME buka dalan atu inklui disiplina Língua Indonézia,” Benjamin afirma.
Benjamin fó deklarasaun ne’e ba STL iha Salaun Ian Martin, Balide, Dili, Kinta (29/10/2026).
Nia hatutan katak, ME planeia rekruta profesór foun na’in 5.000 iha tinan 2027, atu responde ba nesesidade eskola sira no substitui profesór ne’ebé atinje ona idade reforma.
Iha fatin ketak, Diretór Eskola Sekundária Jerál (ESJ) 10 de Dezembru, Comoro, Manuel Verdial, konfirma katak nia eskola mós sei menus profesór ba disiplina Língua Portugés, Inglés no disiplina seluk.
Nia husu ME atu fó atensaun ba nesesidade ne’e, liuhusi kolokasaun profesór foun ba nia eskola bainhira hala’o prosesu rekrutamentu iha tinan oin.
“Ami nia eskola presiza aumenta profesór ba Língua Portugés, Inglés no disiplina seluk ne’ebé sei presiza iha futuru,” Manuel Verdial hateten.
Manuel espera katak, rekrutamentu profesór foun bele responde ba nesesidade ensinu iha nia eskola, liuliu ba disiplina sira ne’ebé enfrenta menus profesór.
(jac)
