DILI, STLTIMORLESTE.com – Tribunal Judisiál Baucau atualmente iha juíz na’in lima (5) de’it. Numeru ne’e konsidera seidauk sufisiente atu atende volume servisu no kazu pendente iha tribunal ne’e.
Tanba ne’e, Prezidente Tribunal Rekursu, Afonso Carmona dehan, sei haree hamutuk ho Konsellu Superiór Magistratura Judisiária (KSMJ) atu buka solusaun ba falta rekursu umanu, liuliu iha área juíz.
“Tribunal Baucau menus rekursu, liuliu juíz na’in lima. Sira hato’o ona kestaun ne’e ba Konsellu. Kona-ba juíz, ha’u hanoin la iha problema tanba agora ita avalia juíz estájiariu na’in 12. Karik relatóriu final sira-nian remata ona antes fulan Outubru, ita bele koloka sira ona. Ha’u hanoin la iha problema ho ida ne’e,” dehan Afonso Carmona ba jornalista sira iha nia fatin servisu, Kaikoli, Sesta (11/09/2026).
Nia hatutan katak, juíz estájiariu na’in 12 agora hein de’it relatóriu final ne’ebé sei kompleta iha fulan Setembru. Depois ne’e, iha fulan Outubru, sira sei simu pose hanesan juíz karreira.
Iha sorin seluk, Juíz Administradór Yudi Pamukas dehan katak, bainhira nia servisu iha Tribunal Baucau, tribunal ne’e mós iha juíz na’in lima de’it.
“Ha’u antes ne’e hanesan juíz iha Baucau. Iha ne’ebá juíz na’in lima de’it. Tanba ne’e, juíz ida kaer prosesu sivíl, enkuantu juíz na’in haat kaer prosesu kriminál,” dehan Yudi Pamukas.
Nia hatutan katak, atu hamenus kazu pendente, presiza aumenta tan numeru juíz, nune’e bele forma kolektivu rua atu hala’o servisu no acelera prosesu kazu pendente iha Tribunal Baucau.
(ter)
