DILI, STLTIMORLESTE.com – Ministeriu Ensinu Superior Siensia no Kultura (MESSK) hamutuk ho Centro Nacional Chega (CNC) halao lansamentu livru modul ba dosente sira.
“MESSK servisu hamutuk ho CNC halo livru modul, neebe ohin halo lansamentu, modul nee rasik sei entrega ba ensinu superior sira, atu nunee sira bele kontribui TL nian istoria ba ita nian estudantes sira iha nivel ensinu superior, buat ida mais importante tebes ba ita nian rai, hanesan Timoroan ita hotu tenke hatene ita nian istoria, atu koalia istoria neebe lo-loos. Dala barak ema barak koalia, maibe tuir istoria neebe la los,” dehan Ministru Ensinu Superior Siensia no Kultura (MESSK), Jose Honorio da Costa Perreira Jeronimo ba jornalista sira iha salaun CNC, Balide, Sesta nee (28/02/2025).
MESSK Jose hatutan, CNC iha inisiativa diak hodi servisu hamutuk ho MESSK halo modul ida, neebe mak hetan apoiu husi Governu Alemanha, modul nee diak tebes-tebes, hafoin halo lansamentu, hahu distribuisaun ba reitor husi universidade sira, atu sira bele introdus ona istoria TL ba estudantes sira.
“Hanesan iha hau nian diskursu ohin hau dehan ona katak, se Timoroan ida mak la konhese ninia istoria, nee hanesan nia hela iha bidon mamuk ida, neebe baku ba tarotu los, tanba nee agradese ba CNC, eskritor sira no Governu Alemanha neebe fo idea hamutuk halo peskiza, hodi hakerek modul ida nee importante ba TL,” nia afirma.
Nia akresenta, agora bele distribui ona livru modul ida nee ba reitor kada universidade sira, nomos tau iha kurrikulu nasional ensinu superior, atu tinan ida nee ita hahu introdus istoria ba estudante sira no labele halo sasan ida neebe mamuk, tanba haree ba joven barak la hatene istoria TL.
“Ministeriu hanoin katak, importante tebes-tebes servisu hamutuk ho CNC bele introdus istoria ho modul ida neebe mak ohin ita halo lansamentu ona,” nia esplika.
(jac)
