DILI, STLTIMORLESTE.com – Ministru Planeamentu no Investimentu Estratejiku (MPIE), Gastao Sousa relata projetu infraestrutura ba iha Prezidente Republika Jose Ramos Horta.
Bainhira remata hasoru malu, MPIE Gastao Sousa ba jornalista sira iha Palasiu Prezidensial Nikolao Lobato, Bairo Pite Kuarta (04/06/2025) hatete, hasoru malu Prezidente dala rua ona hodi relata kona-ba infraestrutura ba Xefe Estadu.
“Enkontru ho Prezidente Republika nee segundu vez hau mai, liu-liu koalia kona-ba infraestrutura, nia hakarak hatene investimentu fundu petroliferu ba infraestrutura ba saida deit. Mai esplika kona-ba Orsamentu Jeral Estadu 2025, osan hira mak aloka ba infraestrutura, imprestimu hira no ezekusaun maizumenus too hira,” dehan Ministru.
MPIE Gastão hatete, nia esplika ba Prezidente Republika kona-ba prosesu hira mak iha aprosinamentu no hira mak konklui ona nunee Prezidente bele hatene.
“Hau mos esplika ba Prezidente kona-ba prosesu aprosinamentu prosesu hira mak konklui no hira mak sei iha prosesu aprosinamentu, no prezidente mos atu haree ba infraestrutura iha area fronteiras neeba, area fronteira husi Batugade too Suai neeba haree infraestrutura Estrada, postu saude, eskola, merkadu, sei iha reauniuan saida mak halo ba tinan oin,” dehan Ministru.
Ministru dehan, primeiru tenke hatene katak hahu tinan kotuk no tinan nee ezekusaun orsamentu nee tenke bazeia ba programa, se programa laiha labele ezekuta, programa iha osan mak bele ezekuta. Ida nee mak mai fo informasaun ba Prezidente.
“Atu hatete katak projetu neebe agora iha, infraestrutura iha 1.300 resin, projetu maibe laos mil nee kontratu iha hotu kedas lae, maibe iha 400 resin mak kontratu iha balun mai husi tinan hira liu ba sei kontinua nafatin iha lista nee, tanba nee mak semana oin ami sei konvida ministru hotu hotu ba iha neeba deside lo-loos projetu ida neebe mak tenke tau nafatin iha lista para bele hetan finansiamentu iha tinan oin,” dehan Ministru.
Se projetu la lao, hanesan Prezidente sei haruka ba tanba projetu balun prioridade atu ezekuta hodi implementa iha tinan oin.
Aleinde nee husi Janeiru too iha Maiu projetu hira mak impelementa ona, hatan ba kestaun nee Ministru hatete, iha tinan ida nee iha 77 projetu mak konkui.
“Iha tinan ida nee iha 77 projetu mak konklui iha aprosinamentu neebe liu husi konkursu, aprosinamentu nia valor 165 milhões,” katak nia.
Nia hatete, sira neebe liu husi emerjensia sira nee iha projetu lubuk ida, no projetu emerjensia neebe lubuk ida finansia husi fundu infraestrutura.
Ida neebe mak liu husi prosesu aprosinamentu 77 mak konklui ona no sei iha 99 projetu neebe sei iha faze aprosinamentu, espera katak tinan ida nee bele konklui hotu, tanba nee tuir programa neebe ke aprova iha Parlamentu Nasional neebe ministeriu sira mak propoin ba orsamentu 2025 atu ezekuta. Pelumenus hahu tinan ida nee nia laran lae ba tinan oin.
Projetu estrada lubuk ida, projetu irigasaun, projetu balun ba postu polisia, balun postu saude, balun eskola, no relatoriu mos sei haruka mai Prezidente Republika nunee tun ba kraik karik bele akompanha mos ezekusaun no impelementasaun projetu.
(eme)
