DILI, STLTIMORLESTE.com – Ministru Justisa (MJ), Sergio Hornai alerta ba komunidade sira atu labele hela besik tasi ibun, liu-liu ba iha fatin sira neebe dominiu publiku Estadu nian.
“Hau hanoin fo nafatin alerta ba ita boot sira, transmite hela ba sidadaun hotu labele hela besik tasi ibun, labele halo uma iha foho leten,” dehan MJ, Sergio Hornai ba jornalista sira iha Kaikoli, Dili, Tersa (28/01/2025).
Nia hatutan, dala ruma koalia hanesan nee halo rai tetuk tiha ema labele hela iha foho leten, maibe atu hateten deit katak, ida neebe tama ba iha dominiu publiku Estadu distansia tasi ibun ho rai maran tenke regulariza.
Ba iha foho leten sira atu labele provoka kona-ba inundasaun no mos ambiental nian.
Hatan kona-ba Servisu Diresaun Nasional Kadastrais nian, Ministru dehan, foin lalis halao ona enkontru ho Diresaun nee, ho objetivu atu konsolida servisu Diresaun nee nian, oinsa sira bele prosede avervamentu ba iha rai sira neebe iha, atu fo titularidade.
Oinsa mak sira bele konsolida iha baze de dadus, oinsa mak sira bele tun iha terrenu ba iha baze de dadus neebe iha ona, bele halo reverifikasaun ruma. Tanba razaun mota lori tiha estaka, sira tenke ba iha terrenu, defende ba iha pedidu neebe mai bele mai ho sistematiku bele mai ho separadis.
Iha fatin ketak, Akademiku UNTL, Sebastiao dos Santos dehan, presiza duni regulariza rai neebe iha, atu ema labele halo uma iha fatin neebe Estadu bandu.
“Presiza duni regulariza atu ema hotu halo uma iha fatin neebe loos, labele iha fatin neebe risku no protejidu,” dehan nia.
Nia hatutan, iha komunidade balu ladun kompreende, tanba nee kria planu ida atu pesiza esplika ho didiak ba iha komunidade sira, hodi hatene labele halo tan uma iha fatin risku ka fatin neebe Estadu bandu.
(ter)