BAUKAU, STLTIMORLESTE.com – Iha tinan 2025, Governu liu husi Ministeriu Komersiu no Industria (MKI) aloka orsamentu hamutuk milhaun US$ 8 ba konstrusaun merkadu iha Tuanau, Munisipiu Baukau.
“Ligadu ba konstrusaun merkadu munisipal nian, ita espera tinan oin kontrusaun fiziku bele hahu ona. Ita preve orsamentu pur volta US$ 8 Milhões,” hateten Ministru Nino Pereira ba jornalista sira, iha resintu Administrasaun Munisipiu Baukau, hafoin remata enkontu ho Prezidente Autoridade, Veneranda Lemos, Kinta (12/12/2024).
Prosesu konstrusaun merkadu nee tuir nia parte MKI liu husi MOP, PMIE no ADN finaliza ona dezenhu no daudaun iha ona Komisaun Nasional Aprovizionamentu faze prosesu tenderizasaun nian, neebe iha tinan 2025 sei hahu halo konstrusaun.
Tanba konstrusaun nee sei kria kondisaun neebe kompleta ho asesibilidade ba Ema ho Defisiensia no inan isin gravida sira atu bele asesu ba fasilidade sira neebe sei estabelese iha merkadu nee, merkadu munisipal nee rasik ho konseitu Verde neebe kompleta ho Jardim .
Mezmu daudaun Autoridade Munisipiu Baukau rasik inisia planu muda ona vendedores sira ba iha fatin konstrusaun, maibe sei la fo impaktu ba sira nia negosiu, tanba konstrusaun nee rasik ho fazeadamente.
No kontrusaun merkadu foun nee parte husi dezenvolve ekonomia, neebe sei konsentra ema hotu hodi fo susesu ba dezenvolvimentu ekonomia nasaun nian liu husi sosa no faan.
Nunee nia husu ba vendedores sira atu koopera ho prosesu refere, tanba Governu iha hanoin atu kria kondisaun merkadu dignu ba vendedores sira, nunee bainhira konstrusaun iha refer prezisa utiliza ho responsabilidade, tanba parte Jestaun Merkadu Munisipal sei implementa taxa ba vendedores sira hodi utiliza ba nesesidade merkadu nian, liu-liu manutensaun.
Enkuantu, Prezidente Autoridade Munisipiu Baukau, Veneranda Lemos sublina, rai iha merkadu foun Tuanau hamutuk 8 hektare, maibe daudaun utiliza ona hektare 2 resin no restu sei iha hodi utiliza aa konstrusaun merkadu munisipal.
Tanba konstrusaun nee rasik sei la fo impaktu ba negosiante Tuanau hamutuk 879, tanba rai mamuk sei barak, nunee kompanhia manan nain bainhira servisu sei hahu husi fatin neebe daudaun negosiante sira seidauk utiliza.
Maibe liu husi enkontru refere, parte tekniku husi MKI aprezenta katak, merkadu munisipal neebe sei konstrui iha tinan 2025, sei akumula deit negosiante 300.
(EST 2)
