DILI, STLTIMORLESTE.com – Ministeriu Negosiu Estranjeiru no Kooperasaun (MNEK) liu husi Diresaun Nasional Organizasaun Rejional, ohin halo abertura ba reuniaun teknika Ministerial ba dala XV neebe organiza husi PALOP-TL ho Uniaun Europeia (UE).
Diretor Jeral Assuntu Multilateral iha MNEK, Leonito Mantilo hateten, objetivu husi abertura teknika ida nee hodi prepara ba reuniaun teknika ministerial ba dala XV neebe mak sei halao iha loron 6 fulan Junhu tinan nee.
“Hanesan ohin ita boot sira asisti katak, ohin ita halo abertura ba reuniaun teknika, nasaun Afrikanu ba sira neebe mak koalia ho lingua ofisial português ho Timor Leste inklui mos união Europeia, abertura teknika ida nee hodi prepara ba reuniaun ministerial neebe mak sei halao iha loron 6 fulan Junhu tinan nee,” dehan DJ MNEK ba jornalista sira iha Salaun Nobre MNEK, Kuarta (4/06/2025).
Diretor Jeral, Leonito Mantilo Fundamenta, reuniaun ida nee hahu iha loron 4 fulan Junhu, depois sei kontinua ba iha dia 5 Junhu, sei taka iha dia 6 Junhu ba iha nivel ministerial.
“Hau labele koalia ida, hanesan ohin hau esplika ona tekniku sira prepara ba iha loron 6 Junhu sei iha nivel ministerial, ita boot sira sei hetan informasaun detalhadu, ita boot sira horiseik asesu iha chegada katak nasaun balun too uluk ona, ba iha nivel teknika kuaze too hotu ona,” hatete nian.
Enkuantu iha reuniaun teknika Ministerial ba dala XV nee husi nasaun Guine Bissau mak labele partisipa ka marka prezensa iha reuniaun ministerial ida nee, tanba kestaun teknika, nasaun São Tomé Prinsipe, Cabo Verde, Angola no Moçambique mak sei partisipa iha reuniaun teknika ministerial nee.
Nia sublina, reuniaun ida nee reuniaun intensiu ida, tanba sei prepara ba iha ministerial neebe sei iha diskusaun lubuk ida iha nivel teknika nian neebe hahu ohin loron.
“Iha reuniaun ministerial nee sei koalia iha area tolu, primeiru koalia kona-ba Governasaun, segundu koalia kona-ba justisa no ikus liu sei koalia kona-ba kultura, ida nee mak orsida sei foka liu iha neeba,” nia hakotu.
EST 1
