DILI, STLTIMORLESTE.com – Molok halo tomada de pose ba bolsa kandidatu profesores neebe pasa teste iha 2024, Ministeriu Edukasaun (ME) husu sira submete dokumentus, hodi haree fali sira nian apalidu no data moris sala.
Lia hirak nee hatoo husi Diretor Nasional Rekursu Umanu husi ME, Joao Amaral ba jornalista STL iha nia knaar fatin Vila Verde, Kuarta nee (04/06/2025).
“Kona-ba bolsa kandidatu profesores iha 2024 neebe mak atu halo kolokasaun, agora sei simu hela dokumentus, hahu loke horiseik Tersa, sira sei submete hela dokumentus mai, depois sira sei tuir tan formasaun semana ida ou rua tan, tanba nee sira komesa horseik submete ona dokumentus iha INFORDEPE, atu nunee labele iha falhansu. Tanba dokumentus nee lori mai para ita bele haree fila-fali,” dehan nia.
Nia dehan, haruka sira submete dokumentus nee para hodi haree, keta balun naran apalidu no data moris sala bele hadia fila-fali molok koloka, tanba sira nee molok koloka sei fo pose tiha, tanba nee mak presiza sira nian dokumentus, tanba simu sira nian dokumentus hahu horiseik Tersa too dia 13 fulan nee, sira hamutuk 187, sira nee ho valor 60 too 64.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao dehan, ba hirak neebe mak pasa ona iha bolsa kandidatu nee atu koloka nee kompetensia Ministeriu nian, liu-liu hirak neebe ho valor 64 sira nee.
“Hau hanoin ba hirak neebe mak pasa ona iha bolsa kandidatu nee atu koloka nee kompetensia Ministeriu nian, liu-liu hirak neebe ho valor 64 sira nee,” dehan nia.
(jac)
