DILI, STLTIMORLESTE.com – Reprezentante Santa Se iha Timor Leste, Monsenhor Marco Sprizzi halao despedida ho Prezidente Republika (PR), Jose Ramos Horta iha Palasiu Prezidensial, Nicolau Lobato.
“Hau nia despedida tanba iha loron balu sei too semana ida iha loron 8 fulan Marsu, liu tiha tinan 6 furak iha Timor Leste, hau sei fila hikas ba Vatikanu hodi simu knaar foun ida iha Vatikanu, tanba hau hetan nomeasaun husi Santu Padre nuudar Prezidente Ministra Trabalhu nian ba korespondensia ba Supremu husi Vatikanu,” hatete Reprezentante Santa Se iha Timor Leste, Monsenhor Marco Sprizzi ba jornalista sira iha Palasiu Prezidensial, Bairo Pite, Sesta nee (28/02/2025).
Monsenhor dehan, nia mai atu fo adeus ba Prezidente Republika, tanba durante nee iha relasaun ho amizade boot no kolaborasaun boot diak ho Prezidente Republika.
“Molok nia eleitu ba dala rua nuudar Prezidente no Xefe Estadu, ami iha ona relasaun amizade pesoal no depois kolaborasaun perfeitu ho nia, ho governu ho estadu. Entaun nee hanesan enkontru despedida ida neebe ami hanoin buat diak sira neebe ami halo hamutuk. Sim, ida nee mak esforsu ekipa nian, liu-liu durante vizita, Santu Padre, hau hadomi Papa Francisco, maibe ami mos halo buat barak seluk antes no depois vizita no ami agradese ba Maromak ba rezultadu sira neebe ami konsege hetan hamutuk,” katak nia.
Reprezentante Santa Se nee dehan, durante nee nia iha relasaun neebe mak diak tebes ho Prezidente nomos Governu inklui povu Timor Leste.
Oras nee Monsenhor remata ona nia mandatu no reprezentante Santa Se neebe sei troka bainhira mak too Timor Leste, hatan ba kestaun nee Monsenhor dehan, nia ladun hatene lo-loos bainhira mak sei mai.
“Hau la hatene lo-loos bainhira mak nia sei too mai, maibe nia hetan ona nomeasaun no ema neebe iha esperiensia barak. Hau hatene ema ida neebe preparadu tebes, seriu tebes no sei dezenvolve ninia servisu hanesan baibain ho atensaun boot, respeitu boot no ho kolaborasaun boot hodi servisu nafatin ba povu, demokrasia, harmonia no pas iha Timor Leste, laos deit ba igreja maibe ba sosiedade tomak. Hau sei la hatete naran nee agora tanba respeitu ba bispu sira, maibe hau tenke komunika nafatin. Entaun naran mitu sira sei sai iha tempu badak,” katak nia.
Prezidente Republika, Jose Ramos Horta mos hatoo agradese ba reprezentante Santa Se Monsenhor, tanba durante mandatu iha Timor Leste kolabora diak ho Prezidente, Governu, liu liu organiza eventu Sua Santidade Papa Francisco mai Timor Leste lao ho diak.
(eme)
