BAUCAU, STLTIMORLESTE.com – Estrada diresaun husi Baguia Vila ba too iha Suku Afaloicai, Postu Administrativu Baguia, Munisipiu Baucau, Ministeriu Obras Publikas (MOP) sei halo levantamentu dadus topografia atu reabilita.
Koordenador Tekniku Destakadu Obras Publikas Baucau, Diego Cipriano Caleza rekonhese, diresaun estrada husi Baguia Vila too Suku Afaloicai atualidade kondisaun grave, iha neebe liu liu tempu udan fo impaktu ba movimentasaun transporte publiku no privadu.
“Segunda ohin nee orsida ekipa Nasional sei halo levantamentu dadus topografia ba estrada refere hodi bele difini estrutura permanente,” Diego Caleja hateten badak ba STL iha nia knaar fatin Vila Nova Baucau, Segunda (01/06/2026).
Nia esplika, levantamentu topografia importante atu identifika kondisaun rai no karakteristika area estrada nian antes Governu deside modelu konstrusaun neebe apropriadu atu garante durabilidade infraestrutura refere.
Entretantu estrada diresaun husi Baguia Vila ba Suku Afaloicai hamutuk kilometru 10 resin fo asesu ba populasaun husi Suku 4 hamutuk nain 7.745 kompostu Suku Afaloicai ho populasaun hamutuk nain 1.639, Alawa Kraik nain 1.934, Hae-Coni nain 2.807 no Ossohuna iha populasaun hamutuk nain 1.365.
(tom)
