DILI, STLTIMORLESTE.com – Daudaun moras kulit sei domina iha Sentru Saude Munisípiu Ermera, moras kulit nee mosu tanba kauza husi bee neebe la saudavel.
“Moras kulit sei numeru 1 iha Sentru Saude Munisípiu Ermera, tanba kazu moras kulit nee mak husi bee, tanba ita haree ita nia komunidade barak uza haris bee mota,” hatete Diretór Servisu Saúde Munisípiu Ermera, António de Deus Fátima ba jornalista sira iha salaun CNE Dili, Kinta nee (08/05/2025).
Nia esplika, moras kulit nee sai preokupasaun, tanba pasiente mai ho isin katar no liman sira nee katar no kanek hotu.
“Prevensaun mak ita tenke haree bee matan sira neebe moos duni mak ita bele uza, agora ita haree bee mota mos ita ba uza, segundu ita tenke kuidadu ita nia saude, liu-liu kebersihan nee ita tenke hatene, tanba moras ninia kontidu nee ita nia hahalok mos,” nia esplika.
Iha fatin ketak, Pasiente Anita do Carmo Veira deklara, nia hetan moras kulit nee loron lima ona , mais kontinua katar nafatin iha isin loron tomak.
“Hau nia isin loron tomak husi ain too liman katar hotu, depois hau koi too mean mo’s katar nafatin, hau mai konsulta sira sona ona ho aimoruk, mais depois mak ita haree,” nia informa.
Nia koalia, iha fulan kotuk liu ba mos nia isin katar tanba haris bee mota, isin katar too isin loron sira nee mean hotu depois kanek.
(jen)
