AINARO, STLTIMORLESTE.com – Destinasaun turizmu natureza Mota Kei-Lelo neebe lokalizadu iha Postu Administrativu Ainaro Vila, sai ona fatin rekreasaun favoritu ba populasaun Munisípiu Ainaro no vizitante sira husi munisipiu seluk hodi refreska aan no goza tempu hamutuk ho familia iha fin-de-semana.
Ambiente neebe mahon, bee suli moos hanesan kristal, no anin malirin husi foho halo mota nee sai alvu ba komunidade sira neebe buka hakmatek fora hosi atividade loron-loron nian.
Iha loron Sabadu no Domingu, Mota Kei-Lelo simu vizitante oi-oin, komesa husi inan-aman, foinsae, too labarik sira. Populasaun lokal aproveita fasilidade neebe iha hodi halao atividade rekreasaun oi-oin hanesan familia sira lori hahan husi uma ka tein iha mota ibun hodi han hamutuk iha lapa (gazebo) sira, labarik no foinsae sira haksolok hodi nani no haris iha bee malirin neebe suli husi foho leten, inklui mos vizitante sira uza paisajen meiu ambiente mota nian neebe matak hodi tiru foto no fahe iha komunikasaun sosial.
Prezensa populasaun neebe barak iha Mota Kei-Lelo mos hamoris atividade komunitaria iha suku nee. Foinsae no estrutura lokal sira aproveita oportunidade nee hodi halo knaar voluntariu ba kuida seguransa, orientasaun ba vizitante sira, no foti lixo hamutuk hodi manten Mota Kei-Lelo nafatin moos, matak, no furak.
“Iha fin-de-semana ami sempre mai ho família tomak iha nee. Fatin nee besik, fresku, no seguru ba labarik sira atu halimar,” dehan João da Silva, habitante ida hosi Ainaro-Vila ba STL, iha Ainaro, Domingu (23/08/2026).
Nia hatutan katak, kria ambiente neebe hakmatek no seguru hanesan nee bele motiva liu tan komunidade lokal no vizitante sira hodi nafatin mai passa tempu, enkuantu ajuda mos hamoris atividade sosial no meiu ambiente neebe diak iha Ainaro-Vila.
Hodi garante Mota Kei-Lelo nafatin sai fatin rekreasaun neebe diak, autoridade lokal ho estrutura suku kontinua husu ba populasaun no vizitante hotu atu nafatin jere lixo ho responsabel, labele soe foer iha mota laran, no kuida furak natureza nian ba tempu naruk.
Alende populasaun lokal Ainaro, popularidade Mota Kei-Lelo nian mos komesa dada vizitante hosi munisipiu vizinu sira. Habitante ida hosi Munisípiu Manufahi, José da Costa, hateten katak nia ho nia familia hili mai vizita mota nee tanba rona reputasaun ambiente neebe hakmatek no bee neebe moos.
Nia mos husu ba autoridade sira atu nafatin manten seguransa no ijiene iha fatin refere, nunee vizitante hosi liur bele sente seguru no kontente bainhira mai passeiu.
(car)
