DILI, STLTIMORLESTE.com – Komandante Komponente Navál, Komodoro Higinio das Neves dehan, prioridade 2027 mak hadia infrastrutura baze atu ro militar Jako no Betanu bele atraka.
Nia dehan, governu investe ona ba ekipamentu hanesan ro militar rua, Jako no Betanu. Maibe laiha kais neebe adekuadu iha baze, nunee ro sira tenke atraka iha Portu Dili.
“Prioridade numeru um mak infrastrutura. Ita iha ona rekursu umanu no meus. Agora tenke dezenvolve kais para ro bele atraka direta,” nia dehan ba jornalista sira iha Kuartel Jeral F-FDTL Fatuhada, Tersa (25/08/2026).
Nia informa, dezeñu ba Portu Naval atinji ona 100%. Kompaña neebe halo dezeñu konkorda ona. Prosesu tuir mai hein orsamentu husi Ministru Defeza.
“Hau hanesan operasional labele deside. Se orsamentu aprovadu tinan nee diak, se lae ita hein tinan oin,” nia esplika.
Iha fatin hanesan, Akademiku UNTL, Jose Lino da Costa husu governu atu sosa tan ro patrulla. Nia dehan menus ro naval fó oportunidade ba sasan ilegál tama ba Timor.
“Foin daudaun sidadaun Xina uza bandeira Indonézia lori sigaru ilegál mai. Ita labele kontrola tanba ro laiha,” nia hateten.
Tuir planu, Ministeriu Defeza mak sei deside bainhira konstrusaun ba Portu Naval sei hahu.
(jen)
